क्यान धनुषाले प्रभातफेरी कार्यक्रम गरी सूचना तथा सञ्चार प्रविधि दिवस २०८२ भव्य रूपमा मनायो

गिरिजानन्द साह/जनकपुरधाम/बैशाख १९ गते। ‘सूचना प्रविधिको अभियान,डिजिटल नेपालको निर्माण’ भन्ने नाराका साथ धनुषाको जनकपुरधाममा सूचना तथा सञ्चार प्रविधि दिवस २०८२ भव्य रूपमा मनाइएको छ। कम्प्युटर एशोसिएसन नेपाल (क्यान) महासंघ धनुषा शाखाको आयोजनामा शुक्रबार बिहान प्रभातफेरी सहित दिवस मनाइएको हो।

कार्यक्रमको सुरुवात बिहान जनक चोकबाट प्रभातफेरीका साथ गरिएको थियो। प्रभातफेरी जनक चोकबाट सुरु भई जनकपुर रेलवे स्टेशनसम्म पुगेर समापन गरिएको थियो। प्रभातफेरीमा सहभागीहरूले सूचना प्रविधिको महत्व र डिजिटल नेपाल निर्माणको आवश्यकता दर्शाउने नाराबाजी गरेका थिए।

समापन कार्यक्रम जनकपुर रेलवे स्टेशनको प्राङ्गणमा सम्पन्न भयो। कार्यक्रममा क्यान धनुषाका अध्यक्ष विनय साहले वर्तमान युग कम्प्युटर र प्रविधिको युग भएको उल्लेख गर्दै प्रगति र समृद्धिको लागि सूचना प्रविधिमा दक्षता आवश्यक रहेको बताए। “डिजिटल नेपालको सपना साकार पार्न सामूहिक सोच र साझा प्रयासको खाँचो छ,” उनले भने।

कार्यक्रममा क्यान धनुषाका संस्थापक अध्यक्ष तथा वरिष्ठ पत्रकार प्रवीण साह, सचिव विमलेश झा, कम्प्युटर शिक्षक प्रमोद पण्डित, विभिन्न विद्यालयका विद्यार्थी, सञ्चारकर्मी, नागरिक समाजका प्रतिनिधि तथा सर्वसाधारण नागरिकहरूको उल्लेख्य सहभागिता रहेको थियो। दिवसको अवसरमा प्रविधि शिक्षा, डिजिटल साक्षरता तथा साइबर सुरक्षाको विषयमा समेत चर्चा गरिएको आयोजकले जनाएका छन्। क्यान धनुषाले आगामी दिनमा जनकपुरधाम तथा आसपासका क्षेत्रमा प्रविधिको पहुँच विस्तार, विद्यार्थी लक्षित तालिम तथा डिजिटल साक्षरता अभिवृद्धिका कार्यक्रम सञ्चालन गर्ने जनाएको छ।