जनकपुरधाम/वैशाख १७ गते। सपोर्ट नेपालको आयोजनामा आज जनकपुरधाममा “नीति संवाद तथा स्थानीय स्तरको न्यायिक समितिमा विवाद समाधान संयन्त्र” सम्बन्धी एक दिवसीय छलफल कार्यक्रम सम्पन्न भएको छ।
कार्यक्रममा मटिहानी नगरपालिकाका नगर प्रमुख हरिप्रसाद मंडल, उपप्रमुख मंजु देवी साह, विभिन्न वडाका अध्यक्षहरू, कार्यपालिका सदस्यहरू, प्रमुख प्रशासकीय अधिकृत चन्द्रशेखर शर्मा, न्यायिक समितिका सदस्यहरू, नागरिक समाजका प्रतिनिधिहरू, कानुनी क्षेत्रका विज्ञहरू लगायतको सक्रिय सहभागिता रहेको थियो। सपोर्ट नेपालकी अध्यक्ष रोशना खड्का र उपाध्यक्ष सुनिल मल्लिकको उपस्थिति पनि उल्लेखनीय रहेको थियो।
छलफलको मुख्य उद्देश्य स्थानीय तहमा देखिने साना तथा मध्यम खालका विवादहरूको प्रभावकारी समाधानका लागि न्यायिक समितिको भूमिका अझ सशक्त बनाउने रहेको आयोजकले जनाएका छन्।
कार्यक्रमका सहभागीहरूले न्यायिक समितिको कानुनी हैसियत, व्यावसायिक क्षमता अभिवृद्धि, स्रोत साधनको सहज पहुँच, कानुनी प्रशिक्षण, मेलमिलाप प्रक्रिया र जनचेतना अभिवृद्धिका विषयमा महत्वपूर्ण सुझावहरू प्रस्तुत गरेका थिए।
सहभागीहरूको भनाइमा न्यायिक समितिलाई थप सशक्त र दक्ष बनाउने प्रयासले स्थानीय तहमा न्यायिक सेवा प्रवाह प्रभावकारी बनाउन मद्दत पुग्ने विश्वास व्यक्त गरिएको छ।
Discussion about this post