धनुषामा विशेष कार्यक्रमसहित विश्व औलो दिवस २०२५ मनाईयो

गिरिजानन्द साह/वैशाख १२ गते। विश्व औलो दिवस २०२५ आज धनुषामा विशेष कार्यक्रमसहित मनाइएको छ। जिल्ला स्वास्थ्य निर्देशनालय धनुषाको आयोजनामा भएको कार्यक्रममा निर्देशक श्रवण कुमार नायकको अध्यक्षतामा स्वास्थ्यकर्मी, सरोकारवाला निकाय, नागरिक समाजका प्रतिनिधिहरू तथा सञ्चारकर्मीहरूको उल्लेखनीय उपस्थिति रहेको थियो।

“पुनर्लगानी, पुनःसोच र पुनर्जागरण: हामीबाटै औलो निवारण” भन्ने मूल नारासहित कार्यक्रम सम्पन्न गरिएको हो। कार्यक्रममा औलो रोगको नियन्त्रण, निवारण र पूर्ण उन्मूलनका लागि नविन रणनीति तथा समुदायमैत्री पहलहरूबारे छलफल गरिएको थियो।

कार्यक्रमका प्रमुख अतिथि स्वास्थ्य तथा जनसंख्या मन्त्रालयको स्वास्थ्य महाशाखा प्रमुख विपिन कुमार झा रहेका थिए। प्रमुख अतिथि झाले औलो रोगको जोखिम अझै पनि केही भू–भागमा कायमै रहेको उल्लेख गर्दै यसको पूर्ण नियन्त्रणका लागि सरकारी प्रयाससँगै जनस्तरको सहभागिता पनि अपरिहार्य रहेको बताए। उनले भने, “औलोजस्तो रोगको अन्त्य हामी सबैको साझा प्रयासबाट मात्रै सम्भव छ। हामीले अब स्थानीय स्तरमै रणनीति लागू गर्ने ढंगमा अगाडि बढ्नुपर्छ।”

कार्यक्रममा निर्देशक नायकले विगतका वर्षहरूमा जिल्लामा औलो नियन्त्रणका क्षेत्रमा भएका उपलब्धिहरूको समीक्षा गर्दै, अझ प्रभावकारी कार्ययोजना ल्याउने प्रतिबद्धता व्यक्त गरे। उनले स्वास्थ्यकर्मीहरूको समर्पण र समुदायको सहयोगले धनुषालाई निकट भविष्यमा औलोमुक्त जिल्ला बनाउने लक्ष्य रहेको बताए।

अन्य वक्ताहरूले औलो रोगविरुद्ध जनचेतना अभिवृद्धि, निःशुल्क उपचार तथा कीटनाशक झुल वितरणलगायतका अभियानलाई निरन्तरता दिनुपर्नेमा जोड दिए।

विश्व औलो दिवस हरेक वर्ष अप्रिल २५ मा मनाइन्छ, जसको उद्देश्य औलो रोगविरुद्धको चेतना फैलाउने र यसको अन्त्यतर्फ अग्रसर हुने हो। नेपालमा अझै पनि तराईका केही जिल्लाहरूमा औलोको जोखिम कायम रहेको भन्दै सरकारले निगरानी र रोकथामका कार्यक्रमहरू गर्दै आएको छ।