धनुषा/फागुन १५ गते। माइती नेपाल धनुषा जनकपुरधाम शाखाले सन् २०२४ को आफ्नो वार्षिक कार्यसम्पादन प्रतिवेदन सार्वजनिक गरेको छ।आज जनकपुरधाम उपमहानगरपालिकामा मिटिंग गर्दै माइती नेपाल धनुषा जनकपुरधाम शाखाका कार्यक्रम संयोजक पुरुषोत्तम यादवले संगठनले एक वर्षभर गरेका महत्वपूर्ण कामहरुको विवरण सार्वजनिक गरेका हुन्।
उनका अनुसार, २०२४ मा माइती नेपाल धनुषा शाखाले गृह संरक्षणमा १०० जना महिला तथा बालबालिकालाई आश्रय दिएको थियो। तिनमध्ये १८ वर्षभन्दा कम उमेरका ४६ जना र १८ वर्षभन्दा माथिका ५४ जना रहेका थिए। विभिन्न समस्यामा परेका तथा आन्तरिक उद्दार गरिएका ६५ जना, जबरजस्ती करणी पीडित ४ जना, म.बे.बि. मुद्दाका पीडित ३ जना, भारतबाट उद्दार गरिएको १ जना, लैंगिक हिंसाबाट प्रभावित १ जना र सीमावर्ती क्षेत्रबाट उद्दार गरिएका ४४ जना महिला तथा बालबालिका पनि गृह संरक्षणमा राखिएको थियो।
यसैगरी, घरेलु हिंसा तथा अन्य समस्यामा परेका १७२ जनामध्ये १०० जनालाई मनोसामाजिक परामर्श प्रदान गरिएको थियो। उद्धार र संरक्षणमा रहेका धेरैलाई परिवारसँग पुनर्मिलन गराइएको थियो। साथै, सीमा क्षेत्रमा ८,३८२ साधन चेकजाँच गर्दा ५,१९२ जनालाई आवश्यक परामर्श दिइएको थियो। खोजतलासका १५ निवेदनहरुमध्ये १ जनालाई सफलतापूर्वक फेला पारेर परिवारसँग पुनर्मिलन गराइएको थियो।
जनकपुरधाम उपमहानगरपालिकाका उपप्रमुख किशोरी साहको अध्यक्षतामा सम्पन्न कार्यक्रममा जनकपुरधाम उपमहानगरपालिकाका सामाजिक महाशाखाका प्रमुख मिहिलाल यादव, राष्ट्रिय मानव अधिकार आयोग, जिल्ला प्रहरी कार्यालय धनुषा, जिल्ला प्रशासन कार्यालय धनुषा लगायतका सरोकारवालाहरुको उपस्थिति रहेको थियो।
माइती नेपाल धनुषा जनकपुरधाम शाखाले एक वर्षभर गरेका यी प्रभावकारी कार्यहरूले महिला तथा बालबालिकाको सुरक्षामा महत्वपूर्ण योगदान पुर्याएको देखिन्छ।
Discussion about this post