गिरिजानन्द साह/जनकपुरधाम/माघ १७ गते। मधेसी आयोगले जनकपुरधाममा मधेसी समुदायसँग अन्तरक्रिया कार्यक्रम सम्पन्न गरेको छ।
कार्यक्रममा मधेसी आयोगका अध्यक्ष डा. विजय दत्त, आयोगका सदस्य माननीय श्री विजय कुमार गुप्ता, नेपाल पत्रकार महासंघ धनुषाका उपाध्यक्ष अवधेश कामत ,जनकपुरधाम उद्योग वाणिज्य संघका निवर्तमान अध्यक्ष जितेन्द्र महासेठ,राष्ट्रिय मुक्ति क्रान्ति पार्टीका नेता रमण पाण्डे,मारवाडी सेवा समिति जनकपुरधामका अध्यक्ष निर्मल कुमार चौधरी सहित समितिका अन्य पदाधिकारीहरू, मधेसी समुदायका विभिन्न प्रतिनिधि, समाजसेवी, बुद्धिजीवी तथा सरोकारवालाहरूको उल्लेखनीय सहभागिता रहेको थियो।
कार्यक्रममा मधेसी समुदायका हक, अधिकार, पहिचान, सशक्तिकरण तथा समसामयिक विषयहरूबारे विस्तृत छलफल गरिएको थियो। सहभागीहरूले मधेसी समुदायले भोगिरहेको सामाजिक, आर्थिक र राजनीतिक चुनौतीबारे आफ्ना विचार राखेका थिए।
मधेसी आयोगका पदाधिकारीहरूले आयोगको भूमिका, नीति तथा कार्ययोजनाबारे जानकारी गराउँदै मधेसी समुदायको उत्थानका लागि विभिन्न पहलहरू अघि बढाइने प्रतिबद्धता जनाएका छन्।
कार्यक्रममा उपस्थित विशिष्ट व्यक्तिहरूले मधेसी समुदायको हितमा आयोगले प्रभावकारी कदम चाल्नुपर्नेमा जोड दिएका थिए। उनीहरूले सरकार तथा अन्य सम्बद्ध निकायसँग सहकार्य गर्दै मधेसी समुदायको समृद्धि र समान सहभागिताका लागि पहल गर्न आग्रह गरेका छन्।
कार्यक्रम सफलतापूर्वक सम्पन्न भएको आयोजक समितिले जनाएको छ।
Discussion about this post