धनुषामा एक २२ वर्षीय युवकको ४२ वर्षीया एकल महिलासँग प्रेम,विवाह गर्न दबाब दिएपछि प्रेमिकाको ह त्या

जनकपुरधाम/जेठ ३० गते । धनुषामा एक प्रेमीले प्रेमिकाको ह त्या गरेका छन् । प्रेमिकाले पटक–पटक विवाहका लागि दबाब दिएपछि प्रेमीले ह त्या गरेको अनुसन्धानबाट खुलेको प्रहरीले जनाएको छ ।

मिथिला बिहारी नगरपालिका–८ तारापट्टीकी ४२ वर्षीया उषा दासको हत्या आरोपमा पक्राउ परेका २२ वर्षीय ओमलाल मण्डललाई आज (मंगलबार) धनुषा प्रहरीले सार्वजनिक गरेको छ ।

बाराको कलैया नगरपालिका–१८ का मण्डलले जनकपुरधाममा घर बनाउने मिस्त्रीको काम गर्दै आएका थिए । सोही क्रममा तीन वर्षअघि उषासँग चिनजान भएर प्रेम सम्बन्ध बसेको अनुसन्धानबाट खुलेको प्रहरीले जनाएको छ । प्रहरीका अनुसार ती महिलाले मण्डललाई विवाह गर्न पटक–पटक दबाब दिँदै आएकी थिइन् ।

जेठ २८ गते आइतबार साँझ ५ बजेको समयमा धनुषाको मिथिलाबिहारी नगरपालिका वडा नम्बर–८ तारापट्टीस्थित स्व. रामचन्द्र दासको घर पछाडि २० मिटर दक्षिण पश्चिममा अवस्थित पोखरीको छेउमा गाडिएको एक मृतक व्यक्तिको लाश जंगली जनावरले खोस्रिएर देखिएको सूचना पाएपछि जिल्ला प्रहरी कार्यालयको टोली त्यहाँ पुगेको थियो। 

सड्न लागेको अवस्थामा मृतकको हात देखिएको र उक्त लाश पोखरीको दक्षिण पूर्वपट्टी पानीको सतह भन्दा १ फिटमाथि जमिनमा ४ फिट जति गाडिएको अवस्थाबाट उत्खनन् गरी सनाखत गराउँदा उक्त व्यक्ति स्व. रामचन्द्र दासको श्रीमती ४२ वर्षीया उषा दास रहेको खुलेको थियो।

घटनाको अनुसन्धानका लागि तत्काल मृतकका छोरा २० वर्षीय सोनु दास र बुहारी १८ वर्षीया मञ्जु दासलाई नियन्त्रणमा लिई अनुसन्धान गर्दै जाँदा घटना भएको मितिमा सोनु र मञ्जु कमला नगरपालिका–३ लग्मास्थित ससुराली घर गएका थिए।

मृतकको घरमा समयसमयमा आउने जाने र बस्ने गर्दै आएका ओमलालको संलग्नता रहेको हुन सक्ने आशंका देखिएपछि उनको सुक्ष्म रुपमा खोजलास सुरु गरिएको थियो।

गएको बिहीबार ओमलाल र उषाबीच विवाहकै विषयमा विवाद भएको थियो । ओमलालले रक्सी खाएको समय विवाद हुँदा उनले उषाको घाँटी थिचेर हत्या गरेको धनुषाका प्रहरी उपरीक्षक विश्वराज खड्काको भनाइ छ । उनका अनुसार उषा एकल महिला थिइन् । उनको उमेर बढी भएकाले ओमलालले विवाह गर्न अस्वीकार गर्दै आएका थिए ।

प्रहरीका अनुसार ओमलालले गत बिहीबार राति तारापट्टीस्थित घरमै फलामको रडले हत्या गरी घर पछाडिको पोखरीको डिलमा प्रेमिकाको शव गाडेका थिए । शवको तत्काल व्यवस्थापन गर्न उनले कपडा खोलेर नाङ्गै गाडेको प्रहरीले जनाएको छ ।
मृतक महिलाले प्रयोग गर्ने मोबाइल सोही पोखरीमा फालेको पाइएको थियो । लगाएको कपडा पोखरीको अर्को डिलमा गाडेको प्रहरी अनुसन्धानमा देखिएको छ ।

राति महिलाको हत्या गरी ओमलाल उनकै घरमा बसी भोलिपल्ट जनकपुरधाम आएका थिए । पैसाको व्यवस्थापन गरी उनी अपराध लुकाउन चितवन गएका थिए । मोबाइल लोकेसनका अधारमा प्रहरीले चितवन प्रहरीको सहयोगमा उनलाई सोमबार पक्राउ गरेर धनुषा ल्याएको थियो ।

शवलाई पोष्टमार्टमका लागि प्रादेशिक अस्पतालमा राखेर अन्य थप अनुसन्धान कार्य जारी रहेको धनुषा प्रहरीले जनाएको छ।