जनकपुरधाम/चैत २६ गते । २०७४ सालमा जिल्लामा सक्रिय युवाहरुको समुहद्वारा गठन गरिएको जिल्ला युवा सञ्जाल धनुषाको अध्यक्षमा कुलदिप साह मधेशी सर्वसम्मत चयन भएका छन् ।
शनिबार बसेको सञ्जालको विशेष सधारण सभाबाट कुलदिपको नेतृत्वमा ९ सदस्यीय नयाँ कार्यसमिति चयन गरिएको हो ।
सञ्जालको उपाध्यक्षमा देव महतो, महासचिवमा ओम प्रकाश मण्डल, सचिवमा आनन्द सहनी र कोषाध्यक्षमा खुश्बु कुमारी साहलाई सर्वसम्मत चयन गरिएको छ ।
त्यस्तै, नयाँ कार्यसमितिको सदस्यहरुमा इन्द्रभुषन यादव, बुधेश्वर रजक, सिमा यादव, बजरङ्ग शर्मा र प्रतिभा मण्डल रहेका छन् । नयाँ कार्यसमितिलाई सञ्जालका निवर्तमान अध्यक्ष धिरज साहले अबिर माला लगाई पद हस्तान्तरण गरेका छन् ।
कार्यक्रममा बोल्दै सञ्जालका अध्यक्ष कुलदिप साहले धनुषा जिल्लामा छिटफुट भएर काम गरिरहेका युवाहरुलाई एकजुट भई समान उद्देश्यका साथ एक ठाउँमा आएर अगाडी बढ्न आग्रह गरेका छन् । उनले युवाहरुले फुर्सदको समयमा समाजमा रहेका विकृतीहरुको बिरोधमा आवाज उठाउनु पर्ने कुरामाथिसमेत जोड दिए ।
सञ्जालले फुर्सदको समयमा समाजलाई केही सहयोग गरौं भन्ने उद्देश्यका साथ जिल्लामा युवा सशक्तिकरण, मानव अधिकार, महिला हिंसा, सरसफाइ्, रक्तदान, युवा बहसलगायतका कार्यक्रमहरु गर्दै आएको छ । सञ्जालले प्रत्येक वर्ष अन्तर्राष्ट्रिय युवा दिवससमेत मनाउँदै आएको छ ।
सञ्जालले वर्षमा दुई पटक रक्तदान कार्यक्रम तथा विभिन्न दिवसहरुमा रैली, दिप प्रज्वलन जस्ता कार्यक्रमको आयोजनासमेत गर्दै आएको छ ।
कार्यक्रममा प्राध्यापक अशोक साह, कानूनविज्ञ राजकुमार महासेठ, स्पर्स नेपालका नविन मल्लिकलगायतकाहरुको उपस्थिती रहेको थियो ।
Discussion about this post