उमेश कुमार साह/सप्तरी/भदौ १७ गते।सप्तरीको बलान बिहुल गाउँपालिका १ का वडाध्यक्ष बैद्यनाथ यादवले एक जनासंग फोनमै कमिसन मागिरहेको अडियो बाहिरिएको छ ।
दुई लाखमा नाला बनेको विषयमा वडाध्यक्ष यादवले कमिसन मागेको अडियो सार्वजनिक भएको हो । अडियोमा राजेश पासवानले कमिसन नदिएको भन्दै आनन्द यादवले आफुलाई गाली गरेको दावी गरेका छन् । राजेश पासवान बलान बिहुल गाउँपालिका १ का दलित महिला वडा सदस्य सीता पासवानको श्रीमान् हुन् ।
जवाफमा वडाध्यक्ष यादवले कमिसनको कुरो सबै ठाउँमा लिइने दिइने गरेको जवाफ फर्काएका छन् । कमिसनको कुरो कहिँ कतै नलेखिएको भएपनि कार्यालयलाई चाहिने जिकिर समेत गरेका छन् ।
उनले १० प्रतिशत कमिसनमा कुरो मिलेपछि मात्र उपभोक्ता समिति गठन हुने भनेका छन् । उनले जसले काम गरेको हुँदैन त्यसले कमिसन दिने र आफुले काम गरेकोले कमिसन नदिने तर्क अडियोमा सुनिन्छ । त्यति मात्रै होइन्, गाली गरिएको विषयमा राम्ररी बुझ्न वडाध्यक्ष यादवलाई आग्रह पनि गरिएको र बेवास्ता भए गम्भीर हुने चेतावनी समेत दिएको छ ।
अडियो संवाद काण्डको विषयलाई बलान बिहुल गाउँपालिकाको दयानन्द गोइतले राजनीति प्रतिशोध बताएका छन् । उनले यो कुरा सत्य नभएको दावी गर्दै आइरहेका छन् । उनले अब स्थानीय तहको चुनाव नजिएकोले आफुहरुको छवि खराब गर्न केही तत्व लागि परेको बताउँछन् ।
बलान बिहुल गाउँपालिका सप्तरीको विवादित स्थानीय तहहरुमा १ नम्बर रहने गरेको स्थानीयहरुले पनि आरोप लगाउँदै आएका छन् । आर्थिक वर्ष २०७७/०७८ को अन्तिममा गाउँपालिकाको प्रमुख प्रशासकीय अधिकृतलाई खेदेर पठाइएको थियो । र सोही गाउँपालिकाको स्वास्थ्य संयोजकलाई नै प्रमुख प्रशासकीय अधिकृतको सम्पूर्ण कामकाजको जिम्मेवारी दिइएको छ ।
Discussion about this post