बिहारमा कोसी नदीको तटबन्ध भत्किएपछि हजारौँ परिवार विस्थापित

सौरभ यादव/सप्तरी, साउन ९ गते ।भारतको बिहारस्थित सप्तकोसी नदीको तटबन्ध भत्किएपछि त्यहाँका हजारौँ नागरिकहरु विस्थापति भएका छन् ।

बिहार राज्यको सुपौल जिल्ला अन्तर्गत सिकरहाटामा सप्तकोसी नदीको तटबन्ध शुक्रबार बिहान भत्किएपछि सुपौल र मधुवनी जिल्लाका झण्डै २ हजार मानिस विस्थापित भएका छन् ।

सुपौल जिल्लाका डिएम महेन्द्र कुमारका अनुसार बाढीले दूधैला, दिघिया, बैला, सतोखर्ड लगायत गाउँ जलमग्‍न भएको छ । उनका अनुसार बाढीका कारण झन्डै २ हजार परिवार विस्थापित भएका छन् ।

विस्थापित परिवारहरु भारतीय राष्ट्रिय राजमार्ग९एनएच ५७० सहित अग्लो स्थानमा आश्रय लिइरहेका डिएमले जानकारी दिए । घटनापछि तत्काल तटबन्ध पुनर्निर्माणको कार्य थालिएको छ उनले भने उद्वारको काम पनि सुरु गरिएको बताइएको छ । भारतीय अधिकारीहरुका अनुसार उपलब्ध स्रोतसाधनको अधिकतम प्रयोग गरी पुनर्निर्माणको काम भइरहेको छ ।

१३ वर्षअघि नेपालमा पनि भत्किएको थियो कोसीको तटबन्ध

कोसीको तटबन्ध १३ वर्षअघि नेपालमा पनि भत्किएको थियो । २०६५ भदौ २ गते एक लाख ६८ हजार क्यूसेक पानीको वहाव हुँदा सप्तकोसी नदीले पूर्वी तटबन्ध भत्किएको थियो ।

त्यसबेला कोशीले पूर्वी तटबन्ध भत्काउँदा कोसी गाउँपालिकाका चारवटा मानव वस्तीमा बाढी पसेको थियो । जसले गर्दा ७ हजार ५ सय ६३ परिवार विस्थापित भएका थिए । २०६५ सालअघि कोशी पूर्वको बराहक्षेत्र क्षेत्रका थुप्रै परिवार कोशीबाट पीडित भएका छन् ।

नेपाल सरकारको तथ्यांक अनुसार २०२२ सालयता वराहक्षेत्र क्षेत्रका मात्र ३ हजार ९ सय परिवार बाढीबाट पीडित छन् । तथ्यांकअनुसार ८ हजार ६ सय बिघा खेतीयोग्य उर्वर भूमि कोसीले कटान गरेको छ ।

साभार-अन्नपूर्ण पोस्ट अनलाईन बाट