कोरोनाबाट अति प्रभावित व्यवसायको आयमा १ प्रतिशत मात्रै आयकर लाग्ने

काठमाडौ,जेठ १५ गते।सरकारले कोभिडबाट अति प्रभावित व्यवसायहरुको आयकरमा छुट दिने भएको छ।

आगामी आर्थिक वर्षका लागि अध्यादेशमार्फत आएको बजेटमा कोभिड १९ बाट अति प्रभावित होटल, ट्राभल, टेकिङ, यातायात, हवाई, चलचित्र क्षेत्र र सञ्चार गृहको करयोग्य आयमा १ प्रतिशतमात्रै आयकर लाग्ने व्यवस्था गरी ती व्यवसायको नोक्सानी सार्न मिल्ने अवधि बढाएर १० वर्ष पुर्याइएको छ।

वार्षिक २० लाखसम्म कारोबार भएका करदातालाई ९० प्रतिशत, २० देखि ५० लाख रुपैयाँसम्म कारोबार भएका कर दातालाई ७५ प्रतिशत र वार्षिक ५० देखि १ करोडसम्म कारोबार भएका करदातालाई ५० प्रतिशतले आयकर छुट दिने व्यवस्था गरिएको छ।

आर्थिक वर्ष २०७५।७६ सम्मको वार्षिक विवरण नबुझाएका र नविकरण नगरेका कम्पनी तथा फर्मले २०७८ असोजभित्र जरिवानाको १० प्रतिशत शुल्क बुझाएमा बाँकी शुल्क तथा जरिवाना मिनाहा दिइने भएको छ।

मूल्य अभिबृद्धि र अन्तशुल्क बक्यौता रहेको २०७६ असार मशान्तसम्मको कर रकम र ब्याज रकम २०७८ पुस मशान्तभित्र दाखिला गरेमा शुल्क जरिवना तथा जरिवाना मिनाहा हुने व्यवस्था गरिएको छ।

अक्सिजन सिलिन्डर लगायतका सामान आयात, उत्पादन र आयात तथा विक्री वितरणमा लाग्ने भन्सार महशुल अन्तशुल्क र मूल्य अभिबृद्धि कर २०७८ पुस मशान्तसम्म छुट गरिएको छ भने विद्युतीय सवारी साधनको आयातमा अन्तशुल्क पुर्ण खारेज गरिएको छ भने भन्सार महशुल समेत घटाइएको छ।