विनय यादव/सिरहा/जेठ ९ गते।कोरोना भाइरस संक्रमितका लागि आवश्यक मानिएको रेम्डिसिभिर औषधि सरकारी अस्पतालमा उपचाररत बिरामीलाई जिल्ला कोभिड व्यवस्थापन समिति (डीसीएमसी) सिरहाले निःशुल्क व्यवस्थापन गर्ने भएको छ ।
डीसीएमसी सिरहाको आजको बैठकले यस्तो निर्णय गरेको हो । निजी अस्पतालमा उपचाररत कोभिडका बिरामीले भने सरकारले तोके अनुसारको ४९ सय रकम तिर्नुपर्नेछ ।
जिल्ला अस्पताल र लहानस्थित रामकुमार सारडा उमाप्रसाद मुरारका स्मारक अस्पताल गरी दुई सरकारी अस्पताल तथा निजी कर्जन्हास्थित फूलकुमारी महतो मेमोरियल अस्पतालमा कोभिडका बिरामीको उपचार हुँदै आएको छ । डीसीएमसीको निर्णयअनुसार, जिल्ला अस्पताल र रामकुमार सारडा उमाप्रसाद मुरारका स्मारक अस्पतालले विारमीको नाम र विवरण खुलाई माग गरेमा रेम्डिसिभिर निःशुल्क उपलब्ध गराइनेछ ।
निजी अस्पतालको हकमा भने रेम्डिसिभिर बिरामीको नाम किटान गरी सो औषधि दिनुपर्ने अवस्था प्रमाणित हुने कागजातको आधारमा सरकारले तोकेको मूल्य प्रतिभाइल ४९ सय संकलन गरी जिल्ला प्रशासन कार्यालयको कोभिड कोषमा जम्मा गर्नुपर्नेछ । निजी अस्पतालको बिरामीसँग रेम्डिसिभिर बापत लिइने उक्त रकम कोभिड नियन्त्रणमै खर्च गरिने सिरहाका प्रमुख जिल्ला अधिकारी प्रदीपराज कँडेलले बताए ।
शुक्रबार साँझ मात्रै जिल्लामा स्वास्थ्य सेवा विभागबाट ९० थान रेम्डिसिभिर र १० थान खाली अक्सिजन सिलिण्डर आइपुगेको छ । तत्काल सोही रेम्डिसिभिरबाट व्यवस्थापन गर्ने र मागका हिसाबले थप माग गरिने प्रजिअ कँडेलले जनाए ।
Discussion about this post