जनकपुरधाम,चैत १५ गते। जनकपुरधामस्थित मिथिला नाट्यकला परिषद् (मिनाप) ले प्रत्येक वर्ष आयोजना गर्दै आएको महामूर्ख सम्मेलन अन्र्गत यसवर्षको महामूर्खको उपाधि मदन कृष्ण श्रेष्ठ र हरिवंश आचार्य (महजोडी) लाई प्रदान गरिएको छ ।
मिनापले प्रत्येक वर्ष होली पर्वको अवसरमा आयोजना गर्दै आएको महामूर्ख सम्मेलनमा एक विशिष्ट व्यक्तित्वलाई दिने महामुर्खको पदवी यसपटक मदन कृष्ण श्रेष्ठ र हरिवंश आचार्य (महजोडी) लाई प्रदान गरेको हो । आईतबार जानकी मन्दिरको प्राङ्गणमा आयोजित महामुर्ख सम्मेलनमा उनीहरु दुबैजनालाई महामुर्ख घोषणा गरिएको छ ।
त्यस्तै प्रदेश २ का भौतिक पूर्वाधार विकासमन्त्री जितेन्द्र सोनललाई मुर्ख सिरोमनीको उपाधि प्रदान गरिएको छ । त्यस्तै, जनकपुरधाम उपमहानगरपालिका वडा नम्बर–४ का वडाध्यक्ष सुदर्शन सिंहलाई बैशाखनन्दन, जसपाका केन्द्रिय सदस्य राजिव झालाई वंश कुरहरि, डेली एक्सप्रेस दैनिक पत्रिकाका प्रकाशक शंकर साहलाई मुसरीलाल, जसपा नेतृ विन्दु ठाकुरलाई खपसुरती, जसपा नेता शेषनारायण यादवलाई चोन्हमा, नेपाल शिक्षक संघका प्रदेश २ अध्यक्ष मेघनाथ यादवलाई चौपटानन्द, चित्रकार एस.सी. सुमनलाई तरघुसका, सुरेश शर्मालाई हराशंख, उद्योग, पर्यटन, वन तथा वातावरण मन्त्रालयका सुजित झालाई सिलौटानन्द, साहित्यकार एवं गीतकार अशोक दत्तलाई वोतलानन्द, नेपाल पत्रकार महासंघका पूर्वकोषाध्यक्ष शीतल साहलाई ढोरबा, मोडेल क्याम्पसका सञ्चालक बीरेन्द्र साहलाई लोढाशंकर, कराँतेका प्रशिक्षक बीरेन्द्र कर्णलाई बज्रकीट र मैथिली विकास कोषका अध्यक्ष जीवनाथ चौधरीलाई पटमूर्खको उपाधि प्रदान गरिएको छ ।
मिथिलाको कला संस्कृतिलाई संरक्षण एवं सम्बद्र्धन गर्ने उद्देश्यले थत मिथिला नाट्यकला परिषद् (मिनाप) ले प्रत्येक वर्ष होली पर्वको अवसरमा जनकपुरधामममा हास्यव्यंग्य सांस्कृतिक कार्यक्रम महामुर्ख सम्मेलनको आयोजना गर्दै आईरहेको छ । जनकपुरधाममा मिनापले प्रत्येक वर्ष मनाउने होरी महोत्सव र महामूर्ख सम्मेलन यहाँको प्रमुख आकर्षण मध्येको एक हो ।
मिनापका पूर्वअध्यक्ष सुनिल मल्लिकले होली पर्वको पौराणिक गाथाका विषयवस्तु, ख्यालठट्टा, प्रेमयुक्त र रस मिसिएका मैथिली भाषामा गाइने जोगिरा (फागु गीत) मिथिलाञ्चलमा लोप भइरहेकोले त्यसको संरक्षण गर्न मिनापदे होरी महोत्सव र महामूर्ख सम्मेलनको आयोजना गर्दै आएको बताए ।
उनले भने,’मिथिलाञ्चलमा जोगिरा सुनिन लगभग छोडिएको र भोजपूरी गीतको बिगबिगि बढिरहेको समयमा मिनापले पुरानो संस्कृतिलाई बचाउन प्रत्येक वर्ष होरी महोत्सव र महामूर्ख सम्मलेनको आयोजना गर्दै आईरहेको छ।’
मिनापले वि.सं. २०६१ सालबाट जनकपुरधाममा महामूर्ख सम्मेलनको आरम्भ गरेको थियो । २०६१ सालमा महामूर्खको उपाधी मैथिली कवि नरेश ठाकुर, २०६२ मा तत्कालीन नेकपा एमालेका नेता शीतल झा, २०६३ मा तत्कालीन जनकपुर नगरपालिकाका मेयर हरिबहादुर बिसी, २०६४ मा तत्कालीन सदभावना पार्टीका नेता ओमकुमार झा, २०६५ मा वरिष्ठ साहित्यकार डा. राजेन्द्र विमल, २०६६ मा पूर्वमन्त्री रामचन्द्र झालाई प्रदान गरिएको थियो ।
त्यस्तै, २०६७ सालमा नेपालका चर्चित राजनीतिक विश्लेषक सिके लाल, २०६८ मा साहित्यकार रामभरोष कापडि भ्रमर, २०६९ मा नेपाली काँग्रेस प्रदेश २ का संसदीय दलका नेता रामसरोज यादव, २०७० मा जसपा नेता डा. विजयकुमार सिंह, २०७१ मा प्रदेशसभा सदस्य शत्रुधन महतो, २०७२ मा समसानघाटको स्वरुप परिवर्तन गरी आधुनिक स्वर्गद्वार बनाएर चर्चा बटुलेका पवन सिंघानीयालाई महामुर्खको उपाधी प्रदान गरिएको थियो ।
त्यस्तै २०७३ सालमा सप्तरीको मलेठमा तत्कालीन नेकपा एमालेले गरेको मेची महाकाली अभियानको क्रममा प्रहरीको गोली लागि ५ जनाको मृत्यु भएपछि अन्तिम समयमा होली महोत्सव कार्यक्रम मिनापले स्थगित गरेको थियो ।
२०७४ मा महामुर्खको उपाधी पूर्व राष्ट्रियसभा सदस्य वृषेशचन्द्र लाल, २०७५ मा जनकपुरधाम उपमहानगरपालिकाका मेयर लालकिशोर साहलाई प्रदान गरिएको थियो । त्यस्तै २०७६ सालमा प्रदेश नम्बर २ का मुख्यमन्त्री लालबाबु राउतलाई महामुर्खको उपाधि प्रदान गरिएको थियो ।
साभार-द रियल समाचार अनलाईन बाट
Discussion about this post