प्रदेश २ मा कोरोनाविरुद्धको खोप अभियानको पहिलो दिन ७ सय भन्दा बढीले लगाए खोप

जनकपुरधाम,माघ १४ गते।प्रदेश २ मा कोरोनाविरुद्धको खोप अभियानको पहिलो दिन ७ सय भन्दा बढीले खोप लगाएका छन् ।बुधबार प्रदेश २ का ९ वटा केन्द्र र १४ वटा वुथबाट ७ सय ३३ जनाले कोरोनाविरुद्धको खोप लगाएका हुन ।

स्वास्थ्य निर्देशनालयका निर्देशक विजय कुमार झाका अनुसार अभियानको पहिलो दिन आठ  जिल्लाको अस्पताल र सप्तरीस्थित प्रहरी अस्पतालमा कोरोनाविरुद्धको भ्याक्सिन लगाइएको हो ।

पहिलो चरणमा अग्रपंक्तिमा खटेका स्वास्थ्यकर्मी, सरसफाईकर्मी र सुरक्षाकर्मीहरुलाई भ्याक्सिन लगाइएको छ।

अभियानको पहिलो दिन सबैभन्दा बढी सप्तरीमा एक सय ४६ जनाले भ्याक्सिन लगाएका छन् भने सबैभन्दा कम रौतहटमा २६ जनालाई लगाइएको छ ।

सप्तरीको राजविराजस्थित गजेन्द्र नारायण सिंह सगरमाथा अस्पतालमा ७६ जना र रुपनी प्रादेशिक प्रहरी अस्पतालमा ७० जनाले भ्याक्सिन लगाएका छन् ।

सर्लाहीमा एक सय २९ जना, पर्सामा एक सय १३, सिरहामा एक सय १०, धनुषामा एक सय २, बारामा ७० र महोत्तरीमा ३७ जनाले भ्याक्सिन लगाएको निमित्त निर्देशक झाले बताए ।

प्रदेश २ का मुख्यमन्त्री लालबाबु राउतले वीरगंजको नारायणी उपक्षेत्रीय अस्पताल, आन्तरिक मामिला तथा कानूनमन्त्री ज्ञानेन्द्र कुमार यादवले प्रादेशिक अस्पताल जनकपुरधाम र सामाजिक विकासमन्त्री नवल किशोर साहले सप्तरीको राजविराजस्थित गजेन्द्रनारायण सिंह सगरमाथा अस्पतालबाट अभियानको शुभारम्भ गरेका थिए ।

कोरोना खोपको उदघाटन गर्दै मन्त्री ज्ञानेन्द्र कुमार यादवले स्वास्थ्यकर्मीको सल्लाह अनुसार नडराई ढुक्क भएर खोप लिन सबैसंग आग्रह गरेका छन् ।खोपको कुनै साइड इफेक्ट नभएका बताउँदै उनले कोरोना अन्त्यको एकमात्र विकल्प कोरोना खोपन नै रहेको बताए ।

विकासशील देशमा एक वर्षभित्रै खोप आउनु ठूलो उपलब्धी रहेको भन्दै उनले दुःखको बेला सहयोग गर्ने छिमेकी भारतलाई प्रदेश सरकारको तर्फबाट धन्यवाद समेत दिएका छन् ।