डा. बिबेकको ‘वास्तुशास्त्र’ पुस्तक विश्वभरका पाठकका लागि उपलब्ध

जनकपुरधाम/असोज २२ गते । हस्तरेखा, ज्योतिष तथा वास्तुशास्त्रका क्षेत्रमा उदाउँदो नामका रूपमा परिचित डा. बिबेकद्वारा लिखित पुस्तक ‘वास्तुशास्त्र’ अब विश्वभरका पाठकका लागि उपलब्ध भएको छ।

ज्योतिषशास्त्र तथा वास्तुशास्त्रलाई वैज्ञानिक दृष्टिकोणबाट प्रस्तुत गर्ने उद्देश्यले डा. बिबेकले पुस्तक प्रकाशनमा ल्याएका हुन्। पुस्तक अमेजन तथा फ्लिपकार्ट मार्फत नेपाल, भारतलगायत विश्वका विभिन्न स्थानमा रहेका पाठकले सहज रूपमा प्राप्त गर्न सक्ने जनाइएको छ।

डा. बिबेकका अनुसार परम्परागत रूपमा अभ्यास हुँदै आएका हस्तरेखा, वास्तु तथा ज्योतिषजस्ता विषयलाई आधुनिक र वैज्ञानिक दृष्टिकोणबाट बुझाउने प्रयासस्वरूप पुस्तक तयार गरिएको हो।

उनले भने, “हाम्रो परम्परागत विद्या हस्तरेखा, वास्तु र ज्योतिषलाई वैज्ञानिक आधारमा बुझाउने प्रयासस्वरूप यो पुस्तक ल्याइएको हो।”

पुस्तकमा ज्योतिषशास्त्र, वास्तुशास्त्र, हस्तरेखा र भाग्यबीचको परस्पर सम्बन्धलाई तथ्यमा आधारित ढंगले विश्लेषण गर्ने प्रयास गरिएको छ। पुस्तकले यी विषयमा रुचि राख्ने विद्यार्थी, शोधकर्ता तथा सर्वसाधारण पाठकलाई उपयोगी सामग्री प्रदान गर्ने अपेक्षा गरिएको छ।

नेपाल र भारतमा मात्र नभई विश्वभर रहेका ज्योतिष, वास्तुशास्त्र तथा हस्तरेखासम्बन्धी अध्ययन र अनुसन्धानमा रुचि राख्ने पाठकलाई लक्षित गरेर पुस्तक तयार गरिएको डा. बिबेकले बताएका छन्।

‘इन्जिनियरका लागि वास्तु’ प्रकाशनको तयारी

डा. बिबेकले आगामी दिनमा ‘इन्जिनियरका लागि वास्तु’ शीर्षकको अर्को पुस्तकसमेत प्रकाशन गर्ने तयारी भइरहेको जानकारी दिएका छन्। वास्तुशास्त्रका विषयलाई प्राविधिक तथा इन्जिनियरिङ दृष्टिकोणसँग जोडेर प्रस्तुत गर्ने उद्देश्यले उक्त पुस्तक तयार पारिने बताइएको छ।

ज्योतिष परिवारको योगदान

डा. बिबेक प्रख्यात वरिष्ठ ज्योतिष अशोक पाण्डेयका सुपुत्र हुन्। उनको परिवारले लामो समयदेखि ज्योतिषीय मार्गदर्शन, भविष्यवाणी तथा वास्तुसम्बन्धी परामर्श दिँदै आएको जनाइएको छ।

स्थानीय तहदेखि मुलुकका विभिन्न क्षेत्रका व्यक्तित्वसम्मलाई ज्योतिषीय मार्गदर्शन तथा वास्तु परामर्श प्रदान गर्दै आएको परिवारको परम्परालाई डा. बिबेकले पनि निरन्तरता दिइरहेका छन्।

युवा उमेरमै ज्योतिष तथा वास्तुशास्त्रको क्षेत्रमा सक्रिय हुँदै आएका डा. बिबेकले अध्ययन, अनुसन्धान र लेखनमार्फत यस क्षेत्रलाई थप व्यवस्थित ढंगले प्रस्तुत गर्ने प्रयास गरिरहेको बताइएको छ।

पुस्तकको सहज उपलब्धता, विषयवस्तुलाई आधुनिक दृष्टिकोणबाट प्रस्तुत गर्ने प्रयास तथा लेखकको अध्ययन र अनुसन्धानका कारण ‘वास्तुशास्त्र’ पुस्तक पाठकमाझ रुचाइएको कृति बन्ने अपेक्षा गरिएको छ।