सप्तरीमा आँपको बागैचामा छोपिएको अवस्थामा एक बालकको शव फेला

उमेश कुमार साह,सप्तरी।सप्तरीको तिलाठी कोइलाडी गाउँपालिका–३ स्थित आँपको बागैचामा छोपिएको अवस्थामा  एक बालक आज मृत भेटिएका छन् ।बिहीबारदेखि बेपत्ता एक बालकलाई ट्याक्टरको ठक्करबाट मृत्यु भएको प्रहरीले जनाएको छ । उनको शव शुक्रबार बिहान आँपको हाँगाले छोपेर लुकाएको अवस्थामा फेला परेको जिल्ला प्रहरी कार्यालय सप्तरीले जनाएको छ ।

सप्तरीको तिलाठी कोइलाडी गाउँपालिका–३ सकरपुराका ६ बर्षीय बालक आनन्द मुखियाको शव यसरी फेला परेको प्रहरी प्रवक्ता प्रहरी नायब उपरीक्षक भुवनेश्वरप्रसाद साहले जानकारी दिए । बिहीबार बेलुका घरबाहिर पूर्वपट्टि आँपको बगैचामा खेल्ने क्रममा बालक आनन्द हराइएको खबर राती प्राप्त भएपछि प्रहरीले खोज्दै जाँदा सो ठाउँदेखि करिब २५ मिटर पर आँपको हाँगाले छोपेको अवस्थामा शुक्रबार बिहान ९ बजेको समयमा बालक मृत फेला परेको सप्तरीका प्रहरी प्रवक्ता प्रनाउ साहले बताए ।

मृतकको शव र घटनाको प्रकृति हेर्दा स १ त ७७५२ नम्बरको सोनाली कम्पनीको ट्याकटरले किच्दा मृत्यु भएको प्रहरीले बताइएको छ । बालक मरेपछि घट्नालाई लुकाउने उद्देश्यले आँपको हाँगाले मृतकलाई छोपी दिएको अवस्थामा फेला परेको प्रारम्भिक अनुसन्धानबाट खुल्न आएको उनले जानकारी दिए ।

बालकलाई ठक्कर दिने ट्याक्टरका चालक फरार भएका छन् । ट्याक्टर र चालकको पहिचान भइसकेको छ । ट्याक्टरलाई प्रहरीले नियन्त्रणमा लिएको छ भने चालकलाई खोजी भइरहेको प्रहरीले जनाएको छ । बालकको शवलाई पोष्टमार्टमका लागि गजेन्द्रनारायण सिंह अस्पतालमा राखिएको छ । घटना बारे थप अनुसन्धान भइरहेको प्रहरीले बताइएको छ ।