कोरोना सङ्क्रमणबाट सप्तरीमा एक महिलासहित तीन जनाको मृत्यु

सप्तरीमा आज कोरोना सङ्क्रमणबाट एक महिलासहित तीन जनाको मृत्यु भएको छ ।स्वास्थ्य कार्यालय सप्तरीका अनुसार सुनसरीको धरानस्थित वीपी कोइराला स्वास्थ्य विज्ञान प्रतिष्ठान घोपामा उपचाररत एक महिलासहित दुई जना र बिराटनगर स्थित म्याक्स अस्पतालमा एक जना गरी तीन जनाको मृत्यु भएको छ ।

जिल्लाको विष्णुपुर गाउँपालिका वार्ड नम्बर २ घर भई हाल राजविराज–१ बस्ने २३ वर्षीया महिलाको बिहीबार बिहानको समयमा मृत्यु भएको स्वास्थ्य कार्यालय सप्तरीका प्रमूख दुनियालाल यादवले जानकारी दिनुभयो ।

गत १८ गते मंगलबार कोरोना सङ्क्रमण पुष्टि भएको मृतक महिलालाई त्यसको भोलिपल्ट प्रतिष्ठानको कोभिड अस्पतालमा भर्ना गरेको थिए ।

उनी एनिमिया, पेन्सिटोपेनिया, अडल्ट पोलिसिस्टिक डिजिज र हाइपोथाइराडिज्मका बिरामी रहेको बताइएको छ । करिब एक साता अगाडी नै उक्त रोगको उपचारको लागि प्रतिष्ठानमा भर्ना भएको उहाँले बताउनुभयो ।

त्यस्तै राजविराज–८ का ६५ वर्षीय पुरूषको पनि बिहान ८ बजे प्रतिष्ठानमै मृत्यु भएको छ ।

गत १५ गते शनिबार कोरोना सङ्क्रमण पुष्टि भएको पुरुषलाई सोही दिन अस्पताल भर्ना भएका थियो ।

स्वास्थ्य कार्यालय सप्तरीका प्रमूख यादवका अनुसार महदेवा गाउँपालिका–४ बस्ने ३० वर्षीय एक पुरुषको उपचारको क्रममा गएराती मृत्यु भएको छ ।बिरानगरस्थित म्याक्स अस्पतालमा उपचारको क्रममा उनको मृत्यु भएको उहाँले बताउनुभयो ।

मृतक तीनै जनाको शव व्यवस्थापनको आवश्यक तयारी भइरहेको बताइएको छ । यससँगै जिल्लामा कोरोना सङ्क्रमणबाट मृत्यु हुनेको संख्या ३१ पुगेको छ ।