राजस्थानद्वारा मुम्बई ८ विकेटले पराजित,राजस्थानको यो जित संगै चेन्नई सुपर किंग्स बाहिरीयो

एजेन्सी।आईपीएलमा राजस्थान रोयल्सले मुम्बई इन्डियन्सलाई आठ विकेटले पराजित गरेको छ ।

मुम्बई इन्डियन्सले दिएको १९६ रनको विजय लक्ष्य राजस्थानले १० बल बाँकी छँदै पूरा गर्यो ।

बेन स्टोक्सले नटआउट १०७ र सामसनले नटआउट ५४ रन बनाए । यी दुवैले तेस्रो विकेटका लागि १३.४ ओभरमा १५२ रनको साझेदारी गरे । स्टोक्स म्यान अफ द म्याच भए ।

बलिङतर्फ मुम्बईका लागि जेम्स प्याटिन्सले दुई विकेट लिए ।

दुबईमा जारी आईपीएलको १३ औं संस्करणमा राजस्थानको यो पाँचौ जित हो । यो जितसँगै राजस्थान छैटौं स्थानमा उक्लिएको छ ।

यसअघि टस जितेर पहिले ब्याटिङ गरेको मुम्बईले निर्धारित २० ओभरमा ५ विकेट गुमाउँदै १९५ रन बनाएको थियो । मुम्बईका लागि हार्दिक पाण्ड्याले केबल २१ बलमा नटआउट ६० रन बनाएका थिए । उनले ७ छक्का र २ चौका प्रहार गरे ।यसैगरी सूर्यकुमार यादवले ४०, इशान किसनले ३७ र सौरभ तिवारीले ३४ रन बनाए ।

बलिङतर्फ राजस्थानका जोफ्रा आर्चर र श्रेयस गोपालले २–२ विकेट लिए ।अंकित राजपुत महँगा बलर साबित भए । उनले चार ओभरमा ६० रन दिए । यस्तै कार्तिक त्यागीले ४५ रन खर्च गरे ।

राजस्थानको यो जित संगै साविक उपविजेता चेन्नई सुपर किंग्स यूएईमा जारी १३औं संस्करणको आईपीएल टी-ट्वान्टी क्रिकेटबाट बाहिरिएको छ ।

राजस्थानले मुम्बईमाथि ८ विकेटको शानदार जित निकालेसँगै प्लेअफमा पुग्ने चेन्नईको समीकरण समाप्त भएको हो ।

चेन्नईले लिगको बाँकी दुई खेल जिते पनि प्ले अफ पुग्ने छैन । चेन्नईले अब दुई खेल खेल्न बाँकी रहेको छ ।

१२ खेलमा मात्र ८ अंक जोडेको चेन्नई तालिकाको पुछारमा छ ।