भारतीय प्रसिद्ध गायक एसपी बालासुब्रमण्यमको ७४ बर्षको उमेरमा निधन

एजेन्सी।दक्षिण भारतीय तथा हिन्दी फिल्मका प्रख्यात गायक एसपी बालासुब्रमण्यमको मृत्यु भएको छ।बीबीसीका अनुसार ७४ वर्षीय बालासुब्रमण्यमको चेन्नईस्थित एक अस्पतालमा मृत्यु भएको हो। कोरोना संक्रमणका कारण वहाँको मृत्यु भएको भारतिय सञ्चार माध्यमले जनाएको छ।

दक्षिण भारतीय फिल्ममा पहिचान बनाएपछि बालासुब्रमण्यमले १९८१मा हिन्दी फिल्मका गीत गायन सुरु गरेका थिए । कमल हसन अभिनित ‘एक दुजेके लिए’ फिल्मको ‘तेरे मेरे बीचमे’ बोलको गीतबाट उनले बलिउड गायन करियर सुरु गरेका थिए । यो फिल्मको गीतबाट उनलाई नेशनल अवार्ड समेत मिलेको थियो ।

यसपछि उनले कयौ राम्रा गीतहरु हिन्दी फिल्मका लागि दिएका छन् । दक्षिण भारतमा जन्मिएका बालासुब्रमण्यम धेरै भाषामा समेत गीत गाउथे । तर गीत गाउने प्रेरणा आफुलाई हिन्दी गीतबाट मिलेको बताउदै आएका थिए ।

हिन्दी, तमिल, तेलगु र कन्नड गरेर ४ भाषामा ६ नेशनल अवार्ड जितेका बालासुब्रमण्यमले कमल हसन, रजनीकान्तदेखि शाहरुख र सलमान खान जस्त पुरै बलिउड स्टारहरुका लागि फिल्म गीत गाएका छन् ।

बालासुब्रमण्यम डबिङ कलाकार पनि थिए । कमल हसनको धेरै तेलुगु फिल्म उनले नै डबिङ गरेका थिए । डबिङका लागि उनलाई दुई पटक नन्दी पुरस्कार समेत मिलेको छ । अनिल कपुर, गिरिशकरनाड, मोहनलालदेखि रजनीकान्तसम्मको तेलुगु फिल्ममा उनले डबिङ गरेका छन् । एक समय उनको आवाजलाई नै सलमान खानको आवाज सम्झिन्थ्यो । सलमानको सुरुवाती करियरमा उनले धेरै गीत गाएका थिए ।

बालासुब्रमण्यमले एकै दिनमा २१ कन्नड गीतलाई आवाज दिएर रेकर्ड समेत बनाएका थिए । सबैभन्दा बढी(४००००) गीत गाउने गायकको रुपमा पनि उनको गिनीज रेकर्डमा पनि नाम रहेको छ ।