निजामती कर्मचारी आधिकारिक ट्रेड यूनियनको निर्वाचन स्थगन गर्ने सरकारको निर्णय

काठमाडौ।सरकारले निजामती कर्मचारीहरूको आधिकारिक ट्रेड यूनियनको निर्वाचन स्थगन गर्ने निर्णय गरेको छ। २४ असोजलाई तय ट्रेड यूनियनको निर्वाचन स्थगन गर्ने निर्णय भएको एक मन्त्रीले बताए। 

मंगलबार प्रधानमन्त्री निवास बालुवाटारमा बसेको मन्त्रिपरिषद् बैठकले अर्को निर्णय नभएसम्मका लागि निर्वाचन स्थगन निर्णय गरेको हो। कोरोनाभाइरस महामारीको जोखिम कम भइनसकेकाले निर्वाचन स्थगन गर्ने निर्णय गरिएको ती मन्त्रीले बताए। 

मंगलबारको मन्त्रिपरिषद् बैठकले गरेका बाँकी निर्णय भने उनले खुलाउन चाहेनन्। “उल्लेख्य निर्णय केही पनि भएको छैन, नियमित बैठक हो। बाँकी निर्णय प्रवक्ता ज्यूले बिहीबार सार्वजनिक गर्नुहुन्छ”, उनले भने। 

यसैबीच प्रदेश २ का मुख्यमन्त्री लालबाबु राउतले सोमबार संघीय मामिला तथा सामान्य प्रशासन मन्त्री हृदयेश त्रिपाठीलाई पत्राचार गरी निर्वाचन स्थगित गर्न आग्रह गरेका थिए । कोरोना महामारी रहेको अवस्थामा निर्वाचन गर्न असहज भएको तथा निर्वाचनविरुद्ध परेको रिट सर्वाेच्च अदालतमा विचाराधीन रहेकाले तत्काल स्थगित गर्न राउतले आग्रह गरेका थिए ।