धनुषामा निषेधाज्ञाको पुनः एक हप्ताका थप,भोलि देखि जोर विजोर प्रणाली अनुसार निजी गाडी चलाउने पाउने (हेर्नुहोस सूचना सहित)

जनकपुरधाम।कोरोना संक्रमितको संख्या दिनहुँ बढ्दै गएकोले धनुषामा निषेधाज्ञाको समयावधि पुनः एक हप्ताका लागि थप गरिएको छ । तर निषेधाज्ञा थपिए पनि निषेधाज्ञा खुकुलो पारिएको छ ।

आईतवार धनुषाका प्रमुख जिल्ला अधिकारी प्रेम प्रसाद भट्टराईले जारी गरेको सूचनामा भदौं २८ गते राति १२ बजेदेखि असोज ४ गते राति १२ बजेसम्मका लागि निषेधाज्ञा थप गरिएको हो । तर सूचनामा सिफ्ट अनुसार सबै पसल संचालन गर्ने पाउने, जोर विजोर प्रणाली अनुसार निजी गाडी चलाउने पाउने र कार्यालयहरु संचालन गर्ने निर्णय गरिएको उल्लेख छ ।

नेपाल राजपत्रमा तोकिएको अत्यावश्यक सेवाहरु बाहेकका अन्य सबै सेवा र स्थलहरु फेरि आगामी ७ दिनसम्मका लागि स्थानीय प्रशासन ऐन, २०२८ को दफा ६ (३) र संक्रामक रोग ऐन २०२० को दफा २ बमोजिम जिल्लाभर निषेधाज्ञाको समयावधि थपिएको धनुषाका प्रमुख जिल्ला अधिकारी प्रेमप्रसाद भट्टराईले जानकारी दिए ।

जिल्ला स्तरिय कोभिड-१९ संकट व्यवस्थापन केन्द्रको सिफारिस र जिल्ला सुरक्षा समितिको आइतवारको निर्णय अनुसार किराना पसल,फलफुल र तरकारी पसलहरु बिहान ११ बजेसम्म र बेलुका ५ बजेदेखि ८ बजेसम्म सञ्चालन गर्न पाइने निर्णय गरिएको छ भने निषेधित बाहेक अन्य पसलहरु ११ बजेदेखि साँझ ६ बजेसम्म सञ्चालन गर्न पाइने भएको छ ।

जिल्ला प्रशासन कार्यालय धनुषाले जारी गरिएको सूचनामा सैलुन, ब्युटीपार्लर, हटिया, सब्जीमण्डी, जिमखाना, सिनेमा हल, पार्टीप्यालेस तथा सपिङ मलहरु भने बन्द राख्न भनिएको छ ।