धनुषामा सामूहिक बलात्कारको आरोपमा एक युवक पक्राउ

जनकपुरधाम । धनुषामा सामूहिक बलात्कारमा संलग्नको आरोप लागेका एक युवक पक्राउ परेका छन् ।पक्राउ पर्नेमा धनुषाधाम नगरपालिका वडा नम्बर २ धरमपुरका १९ वर्षीय विजय कुमार यादव रहेको धनुषा प्रहरीले जनाएको छ ।

सामूहिक बलात्कारमा संलग्न अन्य तीन जना अझै फरार रहेको जिल्ला प्रहरी कार्यालय धनुषाका प्रहरी नायव उपरीक्षक मकेन्द्र कुमार मिश्रले जानकारी दिए ।

गत भदौ १ गते साँझ ६ बजेतिर धरमपुरस्थित धान खेतमा चार जना द्वारा १६ बर्षीया किशोरी माथि सामूहिक बलात्कार भएको थियो ।

आफ्ना दुई जना गाउँले दाजुका साथ ती किशोरी दिदीको घरतर्फ जाँदै गर्दा मोटरसइकलमा आएका चार जना युवकको समूहले सामूहिक बलात्कार गरेको किशोरीको भनाइ उधृत गर्दै प्रहरीले जनाएको छ ।

किशोरीको साथमा रहेका दुई जनालाई हातपात गर्दै घर पठाएर किशोरीलाई बलात्कार गरेको थियो ।

घटनाको अनुसन्धानको क्रममा किशोरीले टिपाएको हुलियाको आधारमा एक जनालाई पक्राउ गरिएको धनुषा प्रहरीका प्रवक्ता मकेन्द्र मिश्रले जानकारी दिए ।
उनीबिरुद्व करणीसम्बन्धी मुद्दामा अनुसन्धानका लागि जिल्ला अदालतबाट अनुमति लिएको मिश्रले बताए ।