सिरहाको मिर्चैयामा बुधबार मृत्यु भएका एकजनाको कोरोना भाइरस संक्रमण पुष्टि

सिरहा। सिरहामा मृत्यु भएका एक पुरुषमा कोरोना संक्रमण पुष्टि भएको छ ।यही भदौ ३ गते मृत्यु भएका सिरहाको मिर्चैया नगरपालिका–४ कुथनमाका का ६८ वर्षीय पुरुषमा शुक्रबार राति कोरोना संक्रमण पुष्टि भएको जिल्ला स्वास्थ्य कार्यालयका प्रमुख कृष्णदेव यादवले जानकारी दिएका छन।

बुधबार उनी गाउँमा हिँडडुल गर्दागर्दै एक्कासि बेहोस भएर ढलेका थिए ।पछिल्लो समय उनी रुघाखोकी र ज्वरोबाट शिकिस्त थिए । लामो समयदेखि उनी मधुमेह र उच्च रक्तचापका दीर्घ रोगी समेत रहेको मिर्चैयाका स्वास्थ शाखा प्रमुख सुरेश सिंहले बताए ।

कोरोना जस्तो लक्षण देखा परेपछि मंगलबार ती पुरुषको थ्रोट स्वाब लिइएको थियो ।बुधबार नै मृत्यु भएका उनको रिपोर्ट आउनु पूर्व गाउँलेहरुले हिन्दु रितिरिबाजअनुसार विधिपूर्वक दाहसंस्कार गरेका थिए ।

तर, दाहसंस्कारपछि बेलुकी मृतकको रिपोर्ट पोजेटिभ देखिएपछि सिंगो गाउँमै संत्रास छाएको छ ।दाहसंस्कार गर्ने गाउँ र आफन्त गरी १५० जना भन्दा बढि मानिस सहभागी थिए । सिरहामा यो सहित कोरोनाबाट भाइरसबाट मृत्यु हुनेको संख्या तीन पुगेको छ। सिरहाको गोलबजार १ जना, मिर्चैया नगरपालिका १ जना र विष्णुपुर गाउँपालिकामा एक जनाको मृत्यु भएको हो ।