प्रहरी सहायक निरिक्षक सहित तीन जनामा कोरोना संक्रमण

जनकपुरधाम : धनुषामा सोमबार थप तीन नयाँ कोरोना संक्रमित फेला परेको छ । जसमध्ये दुई जना प्रहरी र एक जना भारतको मुम्बईबाट आएका गरी तीन जनामा कोरोना संक्रमण भेटिएको छ । स्वास्थ्य तथा जनसंख्या मन्त्रालयका सहप्रवक्ता डा. समिरकुमार अधिकारीले सोमवार प्रेस विज्ञप्ति जारी गर्दै संक्रमण भएको पुष्टि गरेको हो ।

श्रोतका अनुसार ईलाका प्रहरी कार्यालय फुलगामामा कार्यरत रहेका १ जना प्रहरी सहायक निरीक्षक र १ जना प्रहरी कर्मचारीमा कोरोना संक्रमण पुष्टि भएको हो । प्रहरीहरु मध्ये दुबैजना धनुषाको नगराईन नगरपालिका स्थित प्रादेशिक क्वारेन्टाइनमा ड्युटीमा खटिएका प्रहरी हुन् । क्वारेन्टाईनमा एकै पटक पाँच कोरोना संक्रमण भएको पुष्टि पश्चात हाललाई क्वारेन्टाइन सील गरिएको छ ।

यसैगरी थप एक जना स्थानीयबासी रहेका छन् । भारतको मुम्बईबाट गत जेष्ठ ६ गते सिमानाका जटही हुँदै सिधै प्रादेशिक क्वारेन्टाईनमा आएका थिए । उनी घर गएनन् । मुम्बई स्थित कागज कारखानामा काम गर्ने क्रममा लकडाउन पश्चात नेपाल र भारतका केही व्यक्तिहरु सामुहिक बस भाडा गरेर आएको प्रादेशिक क्वारेन्टाइन नगराइनका संयोजक सन्तोष कुमार ठाकुरले जानकारी दिए ।

संक्रमित तीनैजनालाई जनकपुरको कोरोना विशेष अस्पतालमा पठाउने तयारी भइरहेको संयोजक ठाकुरले बताए । योसंगै धनुषामा संक्रमितको ११ पुगेको छ ।