चाडपर्वका बेला खानपानमा हुने अनियमितता, अत्यधिक चिल्लो, पिरो, मीठाई तथा मसलायुक्त भोजनका कारण पाचन प्रणालीमा असर पर्नु स्वाभाविक हो । चाडपर्वपछिको समयमा बिग्रिएको पाचन स्वास्थ्यलाई सुधार गर्न र शरीरलाई पुनः पूर्ववत् अवस्थामा ल्याउन यी उपायहरू अपनाउन सकिन्छ ।
खानपानमा सुधार र हल्का आहार: सजिलो र पच्ने खाना: अत्यधिक मसलायुक्त र चिल्लो खानेकुराको सट्टा घरमै बनेका ताजा, हल्का र छिटो पच्ने खाना (जस्तै: मुसुरा वा मुगको दाल, जाउलो, खिचडी, सादा भात र ताजा तरकारी) लाई प्राथमिकता दिनुहोस् ।
फाइबरयुक्त आहार: पाचन प्रक्रियालाई सक्रिय बनाउन हरिया सागसब्जी, सलाद, फलफूल र फाइबरयुक्त अन्न (जस्तै: गहुँ, जौ, वा कोदो) पर्याप्त मात्रामा सेवन गर्नुहोस् ।
दही वा मोही: दही वा मोहीमा पाइने प्रोबायोटिक्स (राम्रा ब्याक्टेरिया) ले पेटको स्वास्थ्य सुधार्न र पाचनक्रिया बलियो बनाउन सहयोग गर्छ ।
प्रशष्त पानी र झोल पदार्थ पिउने : पर्याप्त पानी पिउने: दिनभरमा कम्तीमा ८–१० गिलास मनतातो वा साधारण पानी पिउनुहोस् । यसले शरीरबाट विषालु पदार्थ बाहिर निकाल्न मद्दत गर्छ ।
अन्य पेय पदार्थ लिने : कागती पानी, जिरा पानी, सौंफको पानी वा ज्वानोको झोल पिउँदा ग्यास, अपच र पेटको भारीपन कम हुन्छ ।
हल्का व्यायाम र योगासन: खाना खाएपछि तुरुन्तै सुत्नु वा बस्नुको सट्टा १५–२० मिनेट बिस्तारै हिँड्ने (वाकिङ) बानी बसाल्नुहोस् । यसबाहेक पवनमुक्तासन, वज्रासन र कपालभाती जस्ता योगासनले पाचन प्रणालीलाई स्वस्थ राख्न मद्दत गर्छन् ।
पर्याप्त निद्रा: शरीर र पाचन प्रणालीलाई रिकभर हुनका लागि दैनिक ७–८ घण्टाको गहिरो र पूर्ण निद्रा अति आवश्यक हुन्छ ।
केही दिनका लागि बार्नुपर्ने कुराहरू पनि रहेका छन् । जस्ताे मैदाबाट बनेका परिकार, बासी तथा जंकफुड, धेरै चिल्लो-पिरो र अत्यधिक चिनीयुक्त मिठाईहरू केही दिनका लागि पूर्ण रूपमा बन्द गर्नुहोस् ।
चिया, कफी वा चिसो पेय पदार्थको सेवन कम गरी हर्बल चिया (ग्रीन टी वा अदुवा-पुदिनाको चिया) सेवन गर्नुहोस् ।
यदि पेट दुख्ने, धेरै ग्यास बन्ने वा पखाला लाग्ने समस्या लगातार रहिरहेमा भने चिकित्सकको सल्लाह लिनु उचित हुन्छ।

















Discussion about this post