जनकपुरधाम/कार्तिक २७ गते । मधेश प्रदेश सरकारले भीमफेदी सडक दुर्घटनामा परी ज्यान गुमाएकाहरूको परिवारलाई जनही एक लाख रुपैयाँ राहत उपलब्ध गराउने निर्णय गरेको छ ।
मुख्यमन्त्री कृष्णप्रसाद यादवको नेतृत्वमा रहेको मधेश प्रदेश सरकारको बिहीबार बसेको मन्त्रिपरिषद् बैठकले दुर्घटनामा मृत्यु भएकाहरूका परिवारलाई जनही एक लाख रुपैयाँ आर्थिक सहायता प्रदान गर्ने निर्णय गरेको हो । असोज ३० गते बसेको उक्त बैठक एमालेले सरकारलाई दिएको समर्थन फिर्ता लिएपछि पहिलोपटक बसेको मन्त्रिपरिषद् बैठकसमेत हो ।
बैठकले दुर्घटनामा घाइते भएकाहरूको उपचारका लागि मधेश प्रदेशअन्तर्गतका प्रादेशिक अस्पतालहरूमा निःशुल्क उपचारको व्यवस्था गर्ने निर्णय पनि गरेको छ ।
त्यसैगरी, मन्त्रिपरिषद् बैठकले भीमफेदी सडक दुर्घटनामा ज्यान गुमाएकाहरूप्रति श्रद्धाञ्जली अर्पण गर्दै दिवंगत आत्माको चिरशान्तिको कामना गरेको छ । साथै, शोकसन्तप्त परिवारजनप्रति गहिरो समवेदना व्यक्त गर्दै शोक प्रस्तावसमेत पारित गरेको छ ।
यसैबीच, मन्त्रिपरिषद् बैठकले कात्तिक २८ गतेदेखि मधेश प्रदेशसभाको बैठक सञ्चालन गर्न प्रदेश प्रमुखसमक्ष सिफारिस गर्ने निर्णय गरेको छ ।
मुख्यमन्त्री यादवले प्रदेशसभाबाट विश्वासको मत लिने तयारीसमेत गरेका छन् । प्रदेशसभाको बैठक सुचारु भएसँगै मुख्यमन्त्रीले सदनमा विश्वासको मत लिने राजनीतिक प्रक्रिया अघि बढ्ने अपेक्षा गरिएको छ ।
Discussion about this post