जनकपुरधाम/कार्तिक २७ गते। कर्णाली प्रदेशमा आयोजना हुने १०औँ राष्ट्रिय खेलकुद प्रतियोगिताका लागि मधेस प्रदेशबाट सहभागी हुने खेलाडी छनोट गर्न प्रदेशस्तरीय प्रतियोगिता सुरु भएको छ।
मधेस खेलकुद परिषद्को दोस्रो वार्षिकोत्सवको अवसर पारेर शुक्रबारदेखि प्रदेशस्तरीय खेलाडी छनोट प्रतियोगिता सुरु गरिएको हो। ‘खेली मधेस, जिती मधेस’ भन्ने नारासहित आयोजना गरिएको प्रतियोगितामा मधेस प्रदेशका आठवटै जिल्लाका खेलाडीहरूले सहभागिता जनाएका छन्।
प्रतियोगितामा उत्कृष्ट प्रदर्शन गर्ने खेलाडीले आगामी १०औँ राष्ट्रिय खेलकुद प्रतियोगितामा मधेस प्रदेशको प्रतिनिधित्व गर्ने अवसर पाउनेछन्। प्रदेशमा खेलकुदको विकास, खेलाडीको क्षमता अभिवृद्धि तथा राष्ट्रियस्तरमा प्रतिस्पर्धा गर्न सक्ने दक्ष खेलाडी उत्पादन गर्ने उद्देश्यले प्रतियोगिता आयोजना गरिएको मधेस खेलकुद परिषद्का सदस्यसचिव शिवजीप्रसाद कानुले जानकारी दिए।
सदस्यसचिव कानुका अनुसार १०औँ राष्ट्रिय खेलकुद प्रतियोगितामा ३२ विधाका खेल समावेश गरिए पनि मधेस प्रदेशले २९ वटा खेलमा सहभागिता जनाउने तयारी गरेको छ।
प्रदेशस्तरीय छनोट प्रतियोगितामा भलिबल, फुटबल, टेबलटेनिस, खो–खो, ह्यान्डबल, तेक्वान्दो, बास्केटबल, जुडो, ब्याडमिन्टन, भारोत्तोलन, बुद्धिचाल, उसु र हक्कीलगायतका खेल समावेश गरिएको उनले बताए।
प्रतियोगिता सञ्चालनका क्रममा विभिन्न अभाव र चुनौतीको सामना गर्नुपरेको उल्लेख गर्दै सदस्यसचिव कानुले मधेस प्रदेशमा खेलकुद क्षेत्रको बजेट कटौतीप्रति चिन्ता व्यक्त गरे। खेलाडीको क्षमता विकास, खेलकुद पूर्वाधार निर्माण र प्रतियोगिताहरूको प्रभावकारी सञ्चालनका लागि प्रदेश सरकारले पर्याप्त बजेट विनियोजन गर्नुपर्नेमा उनले जोड दिए।
खेलकुद क्षेत्रमा पर्याप्त लगानी हुन नसके दक्ष खेलाडी उत्पादन तथा राष्ट्रियस्तरका प्रतियोगितामा प्रदेशको प्रतिस्पर्धात्मक क्षमता अभिवृद्धि गर्न चुनौती हुने उनको भनाइ छ।
Discussion about this post