सर्पदंशबाट बसिरको मृत्यु भएपछि परिवारको बिचल्ली

असोज १९ गते । रातको समय थियो । सबै जना सुतिरहनु भएको थियो । अचानक मो. बसिर चिच्याउनु भयो । परिवारका सदस्य झसङ्ग हुँदै उठेपछि ओछ्यानबाट एउटा सर्प भाग्दै गरेको दृश्य देखियो । त्यसपछि सुरु भयो उपचारका लागि दौडधुप । तर, मोटरसाइकलको व्यवस्था गर्दागर्दै बितेको करिब आधा घण्टाले ३८ वर्षीय बसिरको जीवन खोसिसकेको थियो ।

विषालु करेत सर्पले डसेका बसिरलाई करिब सात किलोमिटर टाढा रहेको कञ्चनपुर अस्पताल लगिए पनि त्यहाँ पुग्नुअघि नै उहाँको मृत्यु भइसकेको थियो ।

आठ दिनअघि भएको यो घटनाले सप्तरीको कञ्चनरुप नगरपालिका ९, रघुनाथपुरस्थित एउटा विपन्न परिवारलाई शोकमा मात्र डुबाएको छैन, छ नाबालक सन्तानको भविष्य समेत अन्योलमा पारिदिएको छ ।

सम्झनामा श्रीमान् , आँखामा आँसु

“सुतेकै ठाउँमा करेतले पिठ्युँमा टोकेको थियो । टोकेको ठाउँमा रगतसमेत देखिएको थियो” श्रीमानको मृत्यु सम्झँदै ३२ वर्षीया खैरुल खातुनले आफ्नो पीडा सुनाउनुभयो ।

केही समय अघिसम्म परिवारको दैनिक गुजारा चलाउन अर्काको घर र खेतबारीमा ज्याला मजदुरी गर्ने श्रीमान् नै मुख्य सहारा सधैंका लागि गुमेपछि अहिले खैरुल सहित उहाँका छ सन्तानको बिचल्ली भएको छ ।

खैरुलसँगै १५ वर्षीया आसमा, १३ वर्षीया मरियम, ११ वर्षीया नाजो, आठ वर्षीया इलिना, छ वर्षीया फतमा र चार वर्षीय छोरा बेसहारा मात्र भएका छैनन्, ऐलानी जग्गामा टिनको छानो भएको सानो झुप्रोमा बस्दै आएको परिवारका लागि अहिले दुई छाक खानु नै सबैभन्दा ठूलो चुनौती बनेको हो ।

“मागेर ल्याएको खानेकुराले अहिले आफू र छोराछोरीको पेट पालिरहेकी छु” खैरुलले भन्नुभयो । स्थानीय समाजसेवी मो। उमरका अनुसार बसिरको परिवार अत्यन्त विपन्न अवस्थामा छ । कमाउने एकमात्र सदस्यको मृत्यु भएपछि परिवारको अवस्था झन् दयनीय बनेको उहाँले सुनाउनुभयो ।

बाबु गुमेपछि विद्यालय पनि छुट्यो

बाबुको मृत्यु भएपछि बसिरका छ वटै सन्तानले पढाइ छाड्नु भएको छ । उहाँहरु टोलकै मदरसामा अध्ययन गर्दै आउनुभएको थियो । अहिले किताब–कापी भन्दा पनि उहाँहरुका लागि दैनिक खानाको चिन्ता ठुलो बनेको छ ।

छोरीहरुलाई पढाएर केही बनाउने र छोराको भविष्य सुरक्षित गर्ने सपना बोक्नु भएकी खैरुललाई अहिले त्यो सपना कसरी पूरा गर्ने भन्ने चिन्ताले सताएको छ ।

सानै उमेरमा विवाह बन्धनमा बाँधिएकी खैरुलले छोराको आशमा पाँच छोरीपछि छैटौं सन्तानका रुपमा छोरा पाउनुभयो । छोरा नसिर जन्मिएपछि घरमा खुसी छाएको थियो । तर, त्यो खुसी लामो समय टिक्न सकेन ।

“पाँच छोरीपछि छोरा जन्मिँदा घरमा खुसी छाएको थियो । अहिले श्रीमानको मृत्युपछि पुरै परिवार शोकमा डुबेको छ, बालबच्चाको भविष्य सम्झदा डर लाग्छ,” उहाँले भन्नुभयो ।

भविष्यको चिन्ता उस्तै

पीडित परिवारको अवस्थाबारे जानकारी पाएपछि स्थानीय समाजसेवी उमरले सहयोगका लागि पहल थाल्नु भएको छ । उहाँको पहलमा विराटनगरस्थित पारस अस्पतालले करिब तीन महिनासम्म पुग्ने खाद्यान्न सामग्री उपलब्ध गराएको हो ।

अस्पतालका डा. मो. सफिउर रहमानको नेतृत्वमा आएको टोली पीडित परिवारको घरमै पुगेर खाद्यान्न हस्तान्तरण गर्नुभएको हो । राहत दिदै डा. रहमानले परिवारका सदस्य बिरामी परेमा पाँच वर्षसम्म आफ्नो अस्पतालमा निःशुल्क स्वास्थ्य उपचार सेवा उपलब्ध गराउने घोषणा गर्नुभयो । तर, केही महिनाको खाद्यान्नले मात्र यो परिवारको भविष्य सुरक्षित हुने अवस्था छैन । खैरुलका लागि अब आफ्ना छ सन्तानको पेट भर्नु, पढाइलाई निरन्तरता दिनु र उहाँहरूलाई सुरक्षित भविष्य दिनु सबैभन्दा ठूलो चुनौती बनेको छ ।

“अब म पनि अर्काको घर र खेतबारीमा मजदुरी गर्छु । तर, छ जना बच्चालाई कसरी पाल्ने, कसरी पढाउने ?” खैरुलले प्रश्न गर्दै सहयोगका लागि याचना समेत गर्नुभयो । गोरखापत्र बाट