जनकपुरधाम/असोज १० गते । नेपाली कांग्रेसका नेता एवं मधेश प्रदेशसभा सदस्य रामसरोज यादवले कांग्रेस सभापति गगन थापालाई ‘गैंग्सटर’ भन्नेहरूप्रति व्यंग्य गर्दै ‘विनाशकाले विपरीत बुद्धि’ भएको टिप्पणी गरेका छन्।
नेपाली कांग्रेस जनकपुरधाम उपमहानगरपालिकाको नगर अधिवेशनमा बोल्दै यादवले केही नेताहरूले बौखलाहटमा जे पायो त्यही बोलिरहेको आरोप लगाए। उनले गगन थापाले भने कुनै पनि पक्षलाई ठेस नपुग्ने गरी संयमित र सन्तुलित अभिव्यक्ति दिने गरेको उल्लेख गरे।
यादवले डिजिटल युगमा विगतका अभिव्यक्ति र गतिविधिहरू लुकाउन नसकिने भन्दै नेताहरूलाई आफ्नो नैतिकता र इमान्दारिता कायम राख्न आग्रह गरे। टिकट वितरणका क्रममा गगन थापालाई ‘भविष्यको प्रधानमन्त्री’ भन्दै समर्थन गर्नेहरूले अहिले आएर फरक धारणा राख्नु उचित नभएको उनको भनाइ थियो।
नेपाली कांग्रेस प्रजातान्त्रिक पार्टी भएकाले पार्टीभित्रको राजनीतिमा नैतिकता र इमान्दारिताको महत्त्वपूर्ण भूमिका रहने यादवले बताए। उनले युवालाई नेतृत्वमा अवसर दिनुपर्नेमा जोड दिँदै नेताहरूले लामो समयदेखि पद र अवसरमा रहिरहने तथा पुरानो ‘ब्याज’ खाने प्रवृत्ति त्याग्नुपर्ने धारणा राखे।
Discussion about this post