रणवीर सिंहको ‘प्रलय’ सुटिङ सुरू, संसारको अन्त्य पछिको दृश्य फिल्ममा हुने

मुम्बई, २ भदौं । रणवीर सिंहको बहुप्रतिक्षित फिल्म ‘प्रलय’ को छायाङ्कन औपचारिक रूपमा सुरु भएको छ।

जय मेहताको निर्देशनमा बन्न लागेको यस चलचित्रलाई अनन्या बिर्लाको बिर्ला स्टुडियोजु, ट्रु स्टोरी फिल्म्स र मा कसम फिल्म्सको ब्यानरमा निर्माण गरिँदै छ। मुम्बईमा छायाङ्कन सुरु भइसकेको यस परियोजनालाई भारतीय चलचित्र जगतको एक वृहत् स्तरको निर्माणका रूपमा चर्चा गरिएको छ।

रणवीर सिंह अभिनित ‘प्रलय’ संसारको अन्त्यको पृष्ठभूमिमा आधारित एक ‘एक्सन थ्रिलर’ चलचित्र हो, जसले मानवताको अस्तित्व नै खतरामा परेको संसारको चित्रण गर्छ। यस चलचित्रले बाँच्नका लागि गरिने संघर्ष, साहस र आफ्ना प्रियजनका लागि लड्ने कथालाई भव्य सिनेमाई शैलीमा प्रस्तुत गर्नेछ। चलचित्र निर्माताहरूका अनुसार उत्कृष्ट दृश्यहरूका साथै यस चलचित्रमा मानवीय भावनाहरूलाई विशेष प्राथमिकता दिइने छ।

‘धुरन्धर’ र ‘धुरन्धरः द रिभेन्ज’ पछि रणवीर सिंहको अर्को मुख्य चलचित्र ‘प्रलय’ हो। रणवीर यसमा मुख्य भूमिकामा मात्र नभई चलचित्रको निर्माताका रूपमा पनि संलग्न छन्। यस पात्रका लागि उनले शारीरिक रूपमा मात्र नभई भावनात्मक रूपमा पनि निकै मेहनत गर्नु पर्नेछ।  ‘लोका’ का लागि परिचित कल्याणी प्रियदर्शन पनि यसमा महत्त्वपूर्ण भूमिकामा देखिने छिन्। साथै, नयाँ पुस्ताका धेरै प्रतिभाशाली कलाकारहरू पनि यस चलचित्रमा समावेश छन्।

यस चलचित्रको निर्देशन जय मेहताले गरिरहेका छन्, जसले यसअघि हन्सल मेहतासँग ‘स्क्याम १९९२ः द हर्षद मेहता स्टोरी’ र ‘लुटेरे’ जस्ता परियोजनाहरूमा काम गरिसकेका छन्। ‘प्रलय’ का लागि भारत तथा विश्वभरका उत्कृष्ट सिर्जनात्मक र प्राविधिक प्रतिभाहरूलाई एकै ठाउँमा ल्याइएको छ। महिनौं लामो प्राविधिक तयारी र विस्तृत पूर्व निर्माण कार्य पछि यसको छायांकन सुरु भएको हो।

‘प्रलय’ को कथावस्तु मुम्बई र यसका आसपासका क्षेत्रहरूमा आधारित छ। कथालाई अझ बढी यथार्थपरक र प्रभावशाली बनाउनका लागि यस चलचित्रको छायाङ्कन मुम्बई र त्यस वरपरका वास्तविक स्थानहरूमा गरिँदै छ। भव्य स्तरमा निर्माण गरिएको यस चलचित्रले यस्तो समयको चित्रण गर्दछ, जब संसार बिस्तारै विनाशको नजिक पुग्दैछ र मानवताले आफ्नो अस्तित्व जोगाउने विशाल चुनौतीको सामना गरिरहेको छ।