एमाले त्यागेर आजपा गएका देवाही गोनाहीका नगरप्रमुख र वडाध्यक्ष पदमुक्त

सञ्जय मिश्रा/रौतहट/साउन १५ गते। रौतहटको देवाही गोनाही नगरपालिकाका नगरप्रमुख प्रेमलाल शाह कानु र वडा नं ४ का वडाध्यक्ष राम प्रवेश प्रसाद कुर्मी स्वतः पदमुक्त भएका छन्।

निर्वाचन आयोगले सूचना प्रकाशित गर्दै उनीहरू प्रचलित कानुनअनुसार पदमुक्त भएको जनाएको छ। उक्त सूचना गोरखापत्रमार्फत सार्वजनिक गरिएको हो।

नगरप्रमुख शाह र वडाध्यक्ष कुर्मी २०७९ सालको स्थानीय तह निर्वाचनमा नेकपा एमालेबाट निर्वाचित भएका थिए। तर, पछिल्लो समय उनीहरू प्रभु शाह नेतृत्वको आम जनता पार्टी आजपामा आबद्ध भएपछि एमाले केन्द्रीय सचिवालयले उनीहरूलाई पार्टीबाट निष्कासन गर्दै त्यससम्बन्धी निर्णय निर्वाचन आयोगमा पठाएको थियो।

आयोगले राजनीतिक दलसम्बन्धी प्रचलित कानुन तथा स्थानीय तहका निर्वाचित जनप्रतिनिधिको दल परिवर्तनसम्बन्धी व्यवस्थाअनुसार दुवै जनप्रतिनिधिलाई पदमुक्त गरेको हो।

नेपालको कानुनी व्यवस्थाअनुसार कुनै निर्वाचित जनप्रतिनिधि आफू निर्वाचित भएको राजनीतिक दल त्यागेर अर्को दलमा गए वा दलले कारबाही गरेको अवस्थामा निश्चित प्रक्रिया पूरा भएपछि उनको पद स्वतः समाप्त हुने व्यवस्था छ। यही व्यवस्थाअनुसार निर्वाचन आयोगले सूचना प्रकाशन गरी पदमुक्त भएको जानकारी गराएको हो।

यो घटनाले रौतहटको स्थानीय राजनीतिमा नयाँ तरंग ल्याएको छ। नगरप्रमुख पद रिक्त भएपछि देवाही गोनाही नगरपालिकाको नेतृत्व व्यवस्थापन, आगामी प्रक्रिया र राजनीतिक समीकरणबारे चासो बढेको छ। साथै वडा नं। ४ को नेतृत्व पनि रिक्त भएकाले त्यहाँको प्रतिनिधित्व र सेवा प्रवाहमा समेत प्रभाव पर्ने देखिएको छ। यस घटनालाई स्थानीय तहमा दल परिवर्तन विरुद्धको कानुनी व्यवस्थाको महत्वपूर्ण अभ्यासका रूपमा पनि हेरिएको छ। आगामी दिनमा अन्य स्थानीय तहका जनप्रतिनिधिका लागि समेत यो निर्णय एउटा सन्देशमूलक नजिर बन्न सक्ने राजनीतिक विश्लेषकहरूको भनाइ छ।