जनकपुरधाम/साउन ११ गते। दलित लाइभ्स म्याटर्स ग्लोबल अलायन्स (DLMGA) को आयोजनामा जनकपुरधाममा ‘सामाजिक न्यायका लागि नीति संवाद’ कार्यक्रम सम्पन्न भएको छ। निर्वाचनसम्बन्धी कानुनको संशोधन तथा एकीकरण गर्न प्रस्तावित विधेयकमा केन्द्रित रहेर आयोजित कार्यक्रममा विभिन्न क्षेत्रका सरोकारवालाहरूको सहभागिता रहेको थियो।
कार्यक्रमको प्रारम्भमा दलित लाइभ्स म्याटर्सका प्रदीप परियारले कार्यक्रमको उद्देश्य र पृष्ठभूमिबारे जानकारी गराएका थिए। उनले प्रस्तावित विधेयकलाई थप समावेशी, न्यायपूर्ण तथा दलित, सीमान्तकृत र बहिष्कृत समुदायमैत्री बनाउन सरोकारवालाको सुझाव संकलन गरी नीति निर्मातासमक्ष पुर्याउने उद्देश्यले कार्यक्रम आयोजना गरिएको बताए।
त्यसपछि दलित सरोकार मञ्चका अध्यक्ष भोला पासवानले निर्वाचनसम्बन्धी कानुन संशोधन र एकीकरण गर्न प्रस्तावित विधेयकका विभिन्न पक्षबारे प्रस्तुतीकरण गरेका थिए। उनले विधेयकमा रहेका व्यवस्थाहरू, सुधार गर्नुपर्ने विषय तथा दलित समुदायको प्रभावकारी राजनीतिक प्रतिनिधित्व सुनिश्चित गर्न आवश्यक कानुनी व्यवस्थाबारे प्रकाश पारे।
कार्यक्रममा सहभागीहरूले दलित समुदायको समान र अर्थपूर्ण राजनीतिक सहभागिता सुनिश्चित गर्न निर्वाचन कानुनमा आवश्यक संशोधन गर्नुपर्नेमा जोड दिएका थिए। उनीहरूले समावेशी प्रतिनिधित्व, समान अवसर तथा सामाजिक न्याय सुनिश्चित हुने गरी कानुनी व्यवस्था गर्न सुझाव दिएका थिए।
सहभागीहरूले आ–आफ्नो अनुभव, सुझाव र धारणा राख्दै निर्वाचन कानुनलाई सामाजिक न्याय, समानता र समावेशी लोकतन्त्रको मर्मअनुसार परिमार्जन गर्नुपर्नेमा जोड दिएका थिए। उनीहरूले दलित समुदायसहित सबै सीमान्तकृत समूहको प्रभावकारी प्रतिनिधित्व सुनिश्चित हुने कानुनी आधार निर्माण गर्न नीति निर्माताले विशेष ध्यान दिनुपर्ने सुझाव दिएका थिए।
संवाद कार्यक्रममा मधेश प्रदेश नीति आयोगका सोहन साह, मधेश प्रदेशसभा सदस्य ललिता दास,यौनिक तथा लैङ्गिक अल्पसंख्यकको तर्फबाट प्रदीप यादव, अधिवक्ता रकी प्रसाद साह,युवा सञ्जाल मधेश प्रदेशका नयुम राइन,दलित समुदायका अगुवा, दलित अधिकारकर्मी,विभिन्न राजनीतिक दलका प्रतिनिधि, संघ–संस्थाका प्रतिनिधि तथा सञ्चारकर्मीहरूको उल्लेखनीय सहभागिता रहेको थियो।
आयोजकका अनुसार कार्यक्रमबाट प्राप्त सुझावहरूलाई संकलन गरी सम्बन्धित नीति निर्माता तथा सरोकारवाला निकायसमक्ष प्रस्तुत गरिनेछ। यसले निर्वाचनसम्बन्धी कानुनलाई थप समावेशी, न्यायपूर्ण र व्यवहारिक बनाउन सहयोग पुग्ने विश्वास आयोजकले व्यक्त गरेको छ।
Discussion about this post