सप्तरीमा वेपत्ता भएको डेढ वर्षपछि कंकाल भेटियो

सप्तरी,माघ २१ गते। वेपत्ता भएको डेढ वर्षपछि सप्तरीको राजगढ गाउँपालिका १ झुटकीकी ७५ वर्षीया राशोदेवी पण्डितको कंकाल भेटिएको छ । पण्डितको बुधबार दिउँसो २ बजेतिर घरदेखि तीन सय मिटर टाढा रहेको सार्वजनिक ठाडी पोखरी जिर्णोद्वारको क्रममा कंकाल भेटिएको हो ।

जिर्णाद्वारमा खटिएका मजदुरहरुले उनको शव सडेगलेको अवस्थामा फेला पारेपछि खबर गरेको डिएसपी भुवनेश्वर साहले बताए । कंकालमा भेटिएको लुगा र दातको आधारमा उनको आफन्तले सनाखत गरेपछि हराएकी महिला पण्डितको नै शव भएको पुष्टि भएको प्रहरीको भनाई छ ।

उनका पति धनई तथा छोरा बुहारीले सनाखत गरेपछि सदगतका लागि जिम्मा लगाई यसबारे आवश्यक अनुसन्धान भइरहेको प्रहरीले जनाएको छ । वेपत्ता पण्डितको कंकाल भेटिएको खबर फैलिएपछि उक्त पोखरी किनारमा गाउँलेको भिड लागेको थियो । डिएसपी साहका अनुसार मानसिक सन्तुलन गुमाएकी पण्डित २०७६ साल साउन ३० गते देखी नै वेपत्ता भएकी थिइन् ।

प्रहरी तथा आफन्तले खोजी कार्य जारि राखेकै बेला घर नजिकैको उक्त पोखरी जिर्णोद्वारको क्रममा उनको कंकाल भेटिएपछि स्थानियले आश्चर्य व्यक्त गरेका छन् ।