रास्वपा केन्द्रीय सदस्यमा ३८४ जनाको उम्मेदवारी, साँझ साढे ७ बजेबाट मतदान

चितवन/असार १० गते। राष्ट्रिय स्वतन्त्र पार्टी (रास्वपा) को प्रथम राष्ट्रिय महाधिवेशनअन्तर्गत केन्द्रीय सदस्य चयनका लागि आज साँझबाट मतदान प्रक्रिया सुरु हुने भएको छ। लामो समयदेखि आन्तरिक प्रक्रियामा रहेको महाधिवेशन अब भने निर्णायक मोडमा पुगेको छ।

रास्वपाका प्रवक्ता मनिष झाका अनुसार, केन्द्रीय सदस्य पदका लागि कुल ३८४ जनाले उम्मेदवारी दर्ता गराएका छन्। उम्मेदवारहरूको प्रारम्भिक सूची सार्वजनिक भइसकेको छ। निर्वाचन तालिकाअनुसार आज साँझ ५ बजेसम्मका लागि दाबी-विरोधको समय तोकिएको छ भने उक्त प्रक्रिया पूरा भएपछि बेलुका ६:३० बजे उम्मेदवारहरूको अन्तिम नामावली प्रकाशन गरिनेछ। अन्तिम नामावली प्रकाशन भएसँगै साँझ साढे ७ बजेबाट मतदान सुरु गर्ने पार्टीको तयारी छ।

गत असार ७ गतेबाट सुरु भई ९ गतेसम्मका लागि तय गरिएको महाधिवेशन निर्धारित समयभन्दा लम्बिन पुगेको छ। मतदान प्रक्रियामा भएको ढिलाइबारे स्पष्ट पार्दै प्रवक्ता झाले यो नियोजित नभई व्यवस्थापकीय कमजोरी भएको स्वीकार गरेका छन्।

उनले भने, ‘हाम्रै ढंग र अनुभव नपुगेर केही ढिलासुस्ती भएको हो। हामीले जिम्मेवारी दिएका व्यक्तिहरूबाट कमजोरी भएको हुन सक्छ, तर पार्टीका कोही पनि सदस्य काम नगरी हात बाँधेर बसेका छैनौं।’

प्रवक्ता झाका अनुसार, यदि आवश्यक परेमा दोस्रो चरणको मतदान भोलि बिहीबार बिहान ९ बजेबाट सुरु गरिनेछ। उनले बिहीबारभित्र महाधिवेशनका सम्पूर्ण सांगठनिक प्रक्रिया र कामहरू सम्पन्न भइसक्ने विश्वास व्यक्त गरेका छन्।