एडिबीको सहयोगमा जनकपुरधामलाई व्यवस्थित सहर बनाइँदै, रु २ अर्ब १३ करोडको योजना सुरु

एशियाली विकास बैंक (एडिबी) को आर्थिक सहयोगमा सञ्चालन हुन लागेको एकीकृत सहरी विकास परियोजना (आईयूडीपी) अन्तर्गत फोहर व्यवस्थापन सुधार, खानेपानी आपूर्ति विस्तार, वर्षायाममा जम्ने पानीको उचित व्यवस्थापन, सडक स्तरोन्नति तथा ढल निकास प्रणालीको सुधारका कार्यक्रम अघि बढाइएको हो।

परियोजनाअन्तर्गत प्राप्त रु २ अर्ब १३ करोड बराबरको ऋण सहयोगबाट जनकपुरधामको सहरी पूर्वाधारलाई आधुनिक र व्यवस्थित बनाउने लक्ष्य राखिएको छ। जनकपुरधाम उपमहानगरपालिकाका प्रमुख मनोज कुमार साह ले सहरको सौन्दर्य अभिवृद्धि गर्दै जनकपुरधामलाई गौरव गर्न लायक नमुना सहरका रूपमा विकास गर्ने उद्देश्यले योजना कार्यान्वयन गर्न लागिएको बताए।

उनका अनुसार परियोजनाको कार्यान्वयनका लागि आवश्यक बोलपत्र आह्वान प्रक्रिया सुरु भइसकेको छ। योजनाको लागतमा नेपाल सरकारले ७५ प्रतिशत व्यहोर्नेछ भने बाँकी रकम उपमहानगरपालिकासहित सम्बन्धित स्थानीय निकायहरूले व्यवस्थापन गर्नेछन्।

परियोजना सम्पन्न भएपछि जनकपुरधाममा फोहर व्यवस्थापन, खानेपानी वितरण, सडक तथा ढल निकास प्रणालीमा सुधार आउनुका साथै वर्षायाममा हुने जलजमावको समस्या न्यूनीकरण हुने अपेक्षा गरिएको छ। यसले सहरको समग्र सौन्दर्य, वातावरणीय स्वच्छता तथा नागरिकको जीवनस्तरमा सकारात्मक प्रभाव पार्ने विश्वास गरिएको छ।