धनुषा/असार ३ गते। ‘जिती मधेश, खेली मधेश’ भन्ने मूल नारासहित जनकपुरधाममा पहिलो पटक राष्ट्रिय कुश्ती प्रतियोगिता बुधबारदेखि सुरु भएको छ। मधेश खेलकुद परिषद्को आयोजनामा सुरु भएको प्रतियोगिताको उद्घाटन मधेश प्रदेशका खेलकुद तथा समाज कल्याण मन्त्री रामलखन दास ले गरेका हुन्।
मधेश खेलकुद परिषद्का सदस्य–सचिव शिवजी प्रसाद गुप्ता को अध्यक्षतामा आयोजित उद्घाटन समारोहलाई सम्बोधन गर्दै मन्त्री दासले कुश्ती नेपालको मौलिक तथा परम्परागत खेल भएको उल्लेख गरे। उनले कुश्ती खेलको संरक्षण, विकास तथा व्यवसायीकरणमा प्रदेश सरकार पूर्ण रूपमा प्रतिबद्ध रहेको बताउँदै यस्ता प्रतियोगिताले खेलाडीहरूको क्षमता अभिवृद्धिसँगै राष्ट्रिय तथा अन्तर्राष्ट्रिय स्तरमा प्रतिस्पर्धा गर्न सक्ने वातावरण तयार गर्ने विश्वास व्यक्त गरे।
अध्यक्षता गर्दै सदस्य–सचिव गुप्ताले मधेश प्रदेशमा पहिलो पटक राष्ट्रियस्तरको कुश्ती प्रतियोगिता आयोजना हुनु प्रदेशकै लागि गौरवको विषय भएको बताए। उनले प्रतियोगिताले कुश्ती खेलप्रति युवापुस्ताको आकर्षण बढाउनुका साथै नयाँ प्रतिभाको खोजी, खेलाडी उत्पादन र खेल संस्कृतिको विकासमा महत्वपूर्ण योगदान पुग्ने विश्वास व्यक्त गरे।
उद्घाटन समारोहमा वक्ताहरूले मधेशको परम्परा र पहिचानसँग जोडिएको कुश्ती खेललाई थप व्यवस्थित र व्यावसायिक बनाउन यस्ता प्रतियोगिताले महत्वपूर्ण भूमिका खेल्ने धारणा राखेका थिए।
आयोजकका अनुसार प्रतियोगितामा विभिन्न प्रदेशका खेलाडीहरूको सहभागिता रहेको छ। प्रतियोगितामार्फत कुश्ती खेलको प्रवर्द्धन, नयाँ प्रतिभाको पहिचान तथा राष्ट्रियस्तरका खेलाडी उत्पादनमा टेवा पुग्ने अपेक्षा गरिएको छ। उत्कृष्ट प्रदर्शन गर्ने खेलाडी तथा टोलीलाई नगद पुरस्कार, ट्रफी र प्रमाणपत्र प्रदान गरिने आयोजकले जनाएको छ।
Discussion about this post