महोत्तरी जेठ २७ गते। महोत्तरीको बर्दिबास नगरपालिका–१४ स्थित एकीकृत नमूना मुसहर बस्तीका १६ जना नेपाली श्रमिकलाई भारतको हरियाणामा बन्धक अवस्थाबाट उद्धार गरी स्वदेश फिर्ता ल्याइएको छ।
भारतीय प्रहरी, नयाँ दिल्लीस्थित नेपाली दूतावास, आफन्त इन्डिया फाउन्डेसन तथा इलाका प्रहरी कार्यालय बर्दिबासको समन्वयमा उनीहरूको उद्धार गरिएको हो। उद्धार गरिएका श्रमिकहरूलाई भिठामोड नाकामार्फत नेपाल ल्याएर परिवारजनको जिम्मा लगाइएको छ।
ती श्रमिकहरूलाई आकर्षक तलब र राम्रो रोजगारीको प्रलोभन देखाएर गत चैत १३ गते भारतको हरियाणा राज्यको झज्जर जिल्लास्थित हेलन गाउँमा रहेको एक कुखुरा फार्ममा कामका लागि लगिएको थियो। तर त्यहाँ पुगेपछि उनीहरूले कुटपिट, धम्की, गालीगलौज तथा श्रम शोषणको सामना गर्नुपरेको बताएका छन्।
पीडित श्रमिकहरूले आफ्नो दयनीय अवस्थाबारे भिडियो र तस्वीरहरू परिवारजनलाई पठाएपछि घटना सार्वजनिक भएको थियो। त्यसपछि परिवारका सदस्यहरूले इलाका प्रहरी कार्यालय बर्दिबासमार्फत नयाँ दिल्लीस्थित नेपाली दूतावाससँग उद्धारका लागि पहल गर्न अनुरोध गरेका थिए।
महोत्तरीका प्रमुख जिल्ला अधिकारी इन्द्रदेव यादव का अनुसार नेपाली दूतावासले भारतीय प्रहरीसँग समन्वय गरी झज्जरस्थित कुखुरा फार्ममै पुगेर श्रमिकहरूको उद्धार गरेको हो।
स्वदेश फर्किएका श्रमिकहरूले परिवारसँग पुनर्मिलन हुने आशासमेत हराइसकेको अवस्थामा नेपाल सरकारका निकायहरूको सक्रिय पहलले आफूहरू सुरक्षित रूपमा घर फर्किन सफल भएको बताएका छन्। भारतमा भोग्नुपरेका दुःख, पीडा र यातनापूर्ण दिन सम्झँदै उनीहरूले उद्धार अभियानमा संलग्न सबै निकायप्रति आभार व्यक्त गरेका छन्।
यस घटनाले वैदेशिक रोजगारीका नाममा हुने मानव बेचबिखन तथा श्रम शोषणका जोखिमप्रति पुनः सचेत गराएको छ। सम्बन्धित निकायहरूले रोजगारीका लागि विदेश जानुअघि आवश्यक प्रक्रिया पूरा गर्न तथा प्रलोभनमा नपर्न सर्वसाधारणलाई आग्रह गरेका छन्।
Discussion about this post