प्रधानमन्त्री बालेनको अभिव्यक्ति गलत र अपरिपक्व’– उपेन्द्र यादव

काठमाडौँ/जेठ १८ गते । जनता समाजवादी पार्टी नेपालका अध्यक्ष उपेन्द्र यादवले सीमासम्बन्धी प्रधानमन्त्री बालेन्द्र शाहको अभिव्यक्ति राष्ट्रिय हितअनुकूल नभएको बताएका छन् । नेपालले भारतको सीमा कतै पनि नमिचेको दाबी गर्दै उनले प्रधानमन्त्रीको संसद्को भनाइप्रति गम्भीर आपत्ति जनाएका हुन् ।

प्रधानमन्त्री शाहले आइतबार प्रतिनिधिसभामा ‘नेपालले पनि भारतको सीमा मिचेको छ’ भनी दिएको अभिव्यक्ति विवादास्पद, गलत र त्रुटिपूर्ण रहेको अध्यक्ष यादवको ठहर छ ।

प्रधानमन्त्री बालेनको अभिव्यक्ति गलत र अपरिपक्व भएको यादवको ठहर छ । उनले सामाजिक सञ्जालमार्फत आफ्नो धारणा सार्वजनिक गरेका हुन् ।

छिमेकी मुलुक भारतसँगको सीमा विवादका विषयमा संसद् र राजनीतिक वृत्तमा बहस तातिरहेका बेला मधेस केन्द्रित राजनीतिको मुख्य शक्ति मानिने जसपा नेपालका अध्यक्ष यादवको यो टिप्पणी सार्वजनिक भएको हो । प्रधानमन्त्रीको उक्त अभिव्यक्तिलाई लिएर संसद्मा विपक्षी दलहरूले मोर्चाबन्दी गरिरहेका बेला यादवले पनि सरकारको परराष्ट्र नीति र कूटनीतिक परिपक्वतामाथि प्रश्न उठाएका छन् ।