जनकपुरधाममा २ अर्बको लगानीमा अन्तर्राष्ट्रियस्तरको पाँचतारे होटल निर्माण सुरु

धनुषा/बैशाख २१ गते । मिथिला हस्पिटालिटी प्रालिले जनकपुरधाम उपमहानगरपालिका–१४ मुजेलियामा अन्तर्राष्ट्रियस्तरको पाँचतारे होटल निर्माण प्रक्रिया औपचारिक रूपमा सुरु गरिएको छ ।

सोमबार भूमि पुजन गरेर गर्दै आधुनिक होटलको निर्माण कार्य शुभारम्भ गरिएको छ । निर्माण गर्न लागेको उक्त होटल करिब २ अर्ब रुपैयाँ लागतमा निर्माण हुन लागेको १२४ कोठा हुने संचालकले बताएको छ। साथै उक्त होटल तीन वर्षभित्र सञ्चालनमा ल्याउने लक्ष्य राखिएको जनाएको छ । धार्मिक तथा सांस्कृतिक नगरी जनकपुरधामलाई ‘वेडिङ डेस्टिनेसन’ तथा अन्तर्राष्ट्रिय पर्यटन केन्द्रका रूपमा विकास गर्ने उद्देश्यसहित परियोजना अघि बढाइएको बताइएको छ ।

कम्पनीका अध्यक्ष रामेश्वर साहले होटल निर्माण कार्य अब तीव्र गतिमा अगाडि बढाइने जानकारी दिँदै यस परियोजनाले जनकपुरधामको पर्यटन पूर्वाधार विस्तारमा महत्वपूर्ण योगदान पुर्‍याउने विश्वास व्यक्त गरे । उनका अनुसार होटलमा अन्तर्राष्ट्रियस्तरका सेवा सुविधा, आधुनिक प्रविधियुक्त व्यवस्थापन, ठूला सम्मेलन तथा विवाह समारोहका लागि विशेष हलको व्यवस्था रहनेछ ।

परियोजनामा ऊर्जा व्यवसायी काजी लामा, व्यवसायी सुदीप चौधरी, ऊर्जाविद् उदयकान्त झा तथा ज्ञानेन्द्र ढुङ्गाना लगायतको संयुक्त लगानी रहेको जनाइएको छ ।
भूमि पूजन कार्यक्रममा मधेश प्रदेशका मुख्यमन्त्री कृष्णप्रसाद यादवले निजी क्षेत्रको यस्ता ठूला लगानीले प्रदेशको आर्थिक गतिविधि विस्तार हुनुका साथै रोजगारी सिर्जनामा महत्वपूर्ण टेवा पुग्ने बताए । उनले परियोजनालाई मधेश प्रदेशकै गौरवको योजनाका रूपमा अगाडि बढाउनुपर्ने धारणा व्यक्त गरे ।

कार्यक्रममा धनुषा–३ का प्रतिनिधिसभा सदस्य मनिष झाले जनकपुरधाममा पहिलो पाँचतारे होटल निर्माण हुनु सकारात्मक र ऐतिहासिक कदम भएको उल्लेख गरे । उनले धार्मिक पर्यटन प्रवर्द्धनका लागि बुद्ध एयरमार्फत जनकपुर–अयोध्या उडान सञ्चालनको तयारी भइरहेको जानकारी समेत दिए ।

जनकपुरधाम उपमहानगरपालिकाका मेयर मनोजकुमार साहले शहरलाई व्यवस्थित, आकर्षक तथा लगानीमैत्री बनाउने लक्ष्यअनुसार पूर्वाधार विकास र सडक सञ्जाल विस्तारलाई प्राथमिकतामा राखिएको बताए ।

त्यसैगरी, उद्योगपति उपेन्द्र महतोले जनकपुरधामको धार्मिक, सांस्कृतिक तथा ऐतिहासिक महत्व अन्तर्राष्ट्रिय स्तरमै विशिष्ट रहेको उल्लेख गर्दै यस्ता परियोजनाले शहरको पहिचानलाई अझ उचाइमा पुर्‍याउने विश्वास व्यक्त गरे ।

पर्यटन, होटल तथा सेवा क्षेत्रमा ठूलो लगानी भित्र्याउने उद्देश्यसहित अघि बढाइएको यस परियोजनाले जनकपुरधामलाई राष्ट्रिय मात्र नभई अन्तर्राष्ट्रिय गन्तव्यका रूपमा स्थापित गर्ने अपेक्षा गरिएको छ । साथै, परियोजनाबाट स्थानीय अर्थतन्त्र सुदृढ हुनुका साथै सयौँ युवाले प्रत्यक्ष तथा अप्रत्यक्ष रोजगारी पाउने विश्वास गरिएको छ ।