धनुषा/गिरिजानन्द साह/बैशाख २१ गते । सामाजिक सेवा, नेतृत्व विकास तथा युवाहरूलाई समाजसेवामा सक्रिय बनाउने उद्देश्यले लियो क्लब अफ जनकपुरधाम क्यापिटल औपचारिक रूपमा चर्टर गरिएको छ।
आज जनकपुरधाममा आयोजित विशेष चार्टर समारोहका बीच लायन्स क्लब अफ जनकपुरधाम गार्गीको स्पोन्सरमा लियो क्लब अफ जनकपुरधाम क्यापिटलको विधिवत् चर्टर सम्पन्न गरिएको हो। समारोहमा लायन्स तथा लियो अभियानसँग आबद्ध विभिन्न व्यक्तित्वहरूको उल्लेखनीय सहभागिता रहेको थियो।
नवगठित लियो क्लब अफ जनकपुरधाम क्यापिटलको अध्यक्षमा लियो विकास साह चयन भएका छन्। त्यसैगरी क्लबको कोषाध्यक्षमा शिवम भगत, सचिवमा पिन्की शर्मा तथा मेम्बरसिप अध्यक्षमा शंकर साह चयन गरिएको जानकारी दिइएको छ।
समारोहमा वक्ताहरूले लियो क्लबले युवाहरूलाई नेतृत्व विकास, सामाजिक उत्तरदायित्व तथा सेवामूलक गतिविधिमा सक्रिय बनाउने विश्वास व्यक्त गरेका थिए। उनीहरूले समाजमा सकारात्मक परिवर्तन ल्याउन युवाको भूमिका महत्वपूर्ण रहने उल्लेख गर्दै नवगठित क्लबलाई सफल कार्यकालको शुभकामना दिएका थिए।
कार्यक्रममा लायन्स क्लब अफ जनकपुरधाम तथा लायन्स क्लब अफ गार्गीका पदाधिकारीहरू, लियो क्लब अफ जनकपुरधाम, बर्दिबास समाज, मिथिला आदर्शका पदाधिकारीहरू तथा विभिन्न लियो र लायन्स क्लबका सदस्यहरूको उपस्थिति रहेको थियो।चार्टर समारोह उत्साहपूर्ण वातावरणमा सम्पन्न भएको आयोजकले जनाएको छ।
Discussion about this post