जानकी मन्दिरका महन्थ र सहायक महन्थलाई सनातन समाजद्वारा सम्मान

धनुषा/फागुन १४ गते। झापाको अर्जुनधारा–४ मा सक्रिय सामाजिक तथा धार्मिक संस्था सनातन समाजले जनकपुरस्थित ऐतिहासिक तथा आस्थाको केन्द्र जानकी मन्दिरका महन्थ तपेश्वर दास र सहायक महन्थ रामरोशन दासलाई सम्मान गरेको छ।

संस्थाका अध्यक्ष ठुली बाबा खड्काको नेतृत्वमा जानकी मन्दिर परिसरमै पुगेर भेटघाट गर्दै उपहारस्वरूप आकर्षक घडी तथा मायाको चिनो प्रदान गरिएको थियो। सम्मान कार्यक्रम धार्मिक वातावरणबीच श्रद्धा र सम्मानका साथ सम्पन्न भएको जनाइएको छ।

सनातन समाजका अध्यक्षका अनुसार महन्थ तपेश्वर दास र सहायक महन्थ रामरोशन दासले लामो समयदेखि मन्दिर व्यवस्थापन, धार्मिक अनुष्ठान सञ्चालन, तथा सनातन धर्मको संरक्षण र प्रवर्द्धनमा महत्वपूर्ण भूमिका निर्वाह गर्दै आउनुभएको छ। उहाँहरूको नेतृत्वमा मन्दिरमा नियमित पूजा–अर्चना, धार्मिक प्रवचन, चाडपर्व विशेष कार्यक्रम तथा सामाजिक सद्भाव प्रवर्द्धनका गतिविधिहरू प्रभावकारी रूपमा सञ्चालन हुँदै आएका छन्।

बरुण झा कश्यप र सबैला निवासी चौठी यादवको विशेष समन्वयमा उपहार र मायाको चिनो सहित सम्मान गरिएको थियो। साथै उक्त अवसरमा बरुण झा कश्यप र सबैला निवासी चौठी यादवलाई पनि मायाको चिनो सहित सम्मान गरिएको थियो। सनातन समाजले आगामी दिनहरूमा पनि देशका विभिन्न धार्मिक स्थलहरूमा पुगेर धर्म, संस्कृति र समाज सेवामा योगदान पुर्‍याउने व्यक्तित्वहरूलाई सम्मान गर्ने योजना रहेको जनाएको छ। समाजले धार्मिक एकता, सांस्कृतिक संरक्षण तथा सामाजिक समरसता कायम गर्ने उद्देश्यसहित यस्ता कार्यक्रमलाई निरन्तरता दिने प्रतिबद्धता व्यक्त गरेको छ।