प्रदेश २ : बलिदानी दिवसमा ६० जना सहिद परिवारलाई सरकारले दोसल्ला र जनही २५ हजार नगद सहित सम्मान

जनकपुरधाम।प्रदेश नं.२ सरकारले मधेश आन्दोलनमा शहादत दिएका शहीदहरुको सम्झना तथा सम्मानमा बलिदानी दिवस मनाएको छ ।जनकपुरमा आज एक कार्यक्रम गरी मनाएको बलिदानी दिवसमा मधेश आन्दोलनको क्रममा प्रदेश २ मा शहादत दिएका ६० जना शहीद परिवारका सदस्यहरुलाई प्रदेश सरकारले दोसल्ला र जनही २५ हजार नगद सहित सम्मान गरेको हो ।

कार्यक्रमका प्रमुख अतिथि जनता समाजवादी पार्टीका बरिष्ठ नेता राजेन्द्र महतो, नेता अनिल झा, मुख्यमन्त्री लालबाबु राउत सहितका प्रदेश सरकार मन्त्रीहरुले शहीद परिवारलाई सम्मान गरेका छन् ।

जनता समाजवादी पार्टी (जसपा) का वरिष्ठ नेता राजेन्द्र महतोले शहीद परिवारको भरणपोषणको व्यवस्था मिलाउन प्रदेश २ सरकारलाई आग्रह गरेका छन् ।मधेशी शहीद प्रतिष्ठान चाँडो गठन गरी शहीद परिवारको शिक्षा, स्वास्थ्यमा सहयोग पुग्ने गरी मासिक भत्ता दिन पनि नेता महतोले आग्रह गरे ।

अहिलेसम्म प्रदेशको नामाकरण र स्थायी राजधानी नतोकिएकोप्रति असन्तुष्टि व्यक्त गर्दै नेता महतोले चाँडो यी कामहरु अगाडि बढाउनुपर्ने पनि बताए ।उनले मन्त्रीहरुले आफ्नो क्षेत्रमुखी बजेटमा बढी ध्यान दिएको भन्दै विगतमा जे जस्तो भएपनि अबको २ बर्षलाई सुधारको बर्ष बनाउनुपर्ने धारणा राखे ।