चार दिवसीय ‘जनकपुरधाम साहित्य, कला तथा अन्तर्राष्ट्रिय नाट्य महोत्सव’ जनकपुरधाममा आज देखि सुरु

धनुषा/फागुन ५ गते । मैथिली विकास कोष को आयोजनामा चार दिवसीय ‘जनकपुरधाम साहित्य, कला तथा अन्तर्राष्ट्रिय नाट्य महोत्सव’ आजदेखि सुरु भएको छ। महोत्सवको औपचारिक उद्घाटन रंगभूमि मैदानबाट भव्य सांस्कृतिक झाँकीसहित गरिएको हो।

उद्घाटन अवसरमा निकालिएको शोभायात्रा रंगभूमि मैदानबाट सुरु भई नगर परिक्रमा गर्दै विभिन्न सांस्कृतिक प्रस्तुति र लोकझाँकीसहित सम्पन्न भएको थियो। मैथिली भेषभूषामा सजिएका कलाकार, स्थानीय समुदायका प्रतिनिधि, विद्यार्थी तथा सर्वसाधारणको उल्लेख्य सहभागिताले जनकपुरधाम का मुख्य सडक क्षेत्र उत्सवमय बनेका थिए।

कोषका अध्यक्ष जीवनाथ चौधरी का अनुसार महोत्सवले जनकपुरधामको बहुआयामिक सांस्कृतिक सम्पदालाई राष्ट्रिय तथा अन्तर्राष्ट्रिय स्तरमा चिनाउने लक्ष्य लिएको छ। विभिन्न जातजाति र समुदायका सांस्कृतिक झल्को प्रस्तुत गरी मौलिक पहिचानलाई सशक्त बनाउने प्रयास गरिएको उनले बताए।
शुक्रबारसम्म सञ्चालन हुने महोत्सवअन्तर्गत साहित्यिक गोष्ठी, कविता वाचन, पुस्तक विमोचन, चित्रकला प्रदर्शनी, नाटक मञ्चन तथा अन्तरक्रिया कार्यक्रमहरू आयोजना गरिने जनाइएको छ।

आयोजकका अनुसार कार्यक्रममा स्थानीयदेखि राष्ट्रिय तथा अन्तर्राष्ट्रिय स्तरका कलाकार, साहित्यकार तथा रंगकर्मीहरूको सहभागिता रहनेछ।

महोत्सवको पहिलो दिन आयोजित सांस्कृतिक झाँकीमा विमलेन्द्र निधि को समेत सहभागिता रहेको थियो। मैथिली भेषभूषामा सजिएर शोभायात्रामा सहभागी भएका उनले महोत्सवको सफलताको कामना गर्दै मैथिली भाषा, साहित्य र संस्कृतिको प्रवर्द्धनमा कोषले खेलेको भूमिकाको प्रशंसा गरे। यस्ता कार्यक्रमले सांस्कृतिक एकता र सामाजिक सद्भाव सुदृढ गर्ने विश्वास पनि उनले व्यक्त गरे।

आयोजक संस्थाले यस वर्ष आफ्नै भवनमा महोत्सव आयोजना गरिएको जनाएको छ। विगत वर्षहरूको अनुभवलाई समेट्दै यस पटक कार्यक्रमलाई अझ व्यवस्थित, फराकिलो तथा अन्तर्राष्ट्रिय सहभागितामुखी बनाइएको दाबी गरिएको छ।

जनकपुरधामको सांस्कृतिक धरोहर, धार्मिक महत्व र ऐतिहासिक पृष्ठभूमिलाई साहित्य र नाट्य माध्यममार्फत विश्वसामु प्रस्तुत गर्ने उद्देश्यसहित महोत्सव आयोजना गरिएको आयोजकको भनाइ छ। महोत्सव सफल बनाउन सम्पूर्ण साहित्यप्रेमी, कलाकार, बुद्धिजीवी तथा सर्वसाधारणलाई सक्रिय सहभागिताका लागि आग्रह समेत गरिएको छ।

जनकपुरधाममा सुरु भएको यो सांस्कृतिक उत्सवले आगामी चार दिन सहरलाई साहित्य, कला र रंगमञ्चको संगमस्थल बनाउने विश्वास व्यक्त गरिएको छ।