धनुषा/माघ २५ गते। नेपाल ललित कला प्रज्ञा प्रतिष्ठान र मैथिली विकास कोष, जनकपुरधामको संयुक्त आयोजनामा ‘प्रादेशिक ललितकला प्रदर्शनी–२०८२’ आजदेखि औपचारिक रूपमा सुरु भएको छ। यसअघि प्राविधिक कारणले स्थगित गरिएको प्रदर्शनी आइतबार जनकपुरधाममा विशेष समारोहका बीच उद्घाटन गरिएको हो।
प्रदर्शनीको उद्घाटन मधेश प्रदेशका प्रदेश प्रमुख डा. सुरेन्द्र लाभ कर्णले गरेका हुन्। उद्घाटन समारोहलाई सम्बोधन गर्दै प्रदेश प्रमुख कर्णले मधेशका कलाकारहरूले आफ्ना सिर्जनामार्फत कला, संस्कृति र पहिचानलाई सशक्त रूपमा उजागर गरिरहेको उल्लेख गर्दै प्रशंसा गरे।
उनले भने, “ललितकला कुनै क्षेत्रको पहिचान र सभ्यताको प्रतिबिम्ब हो। मधेश प्रदेशका कलाकारहरूले आफ्ना सिर्जनामार्फत राष्ट्रिय तथा अन्तर्राष्ट्रिय स्तरमा प्रदेशको गौरव बढाइरहेका छन्। यस्ता प्रदर्शनीहरूले प्रतिभा पहिचान र प्रवर्द्धनमा महत्वपूर्ण भूमिका खेल्छन्।”
प्रदेश प्रमुख कर्णले कला र संस्कृतिको संरक्षण तथा प्रवर्द्धनमा राज्यले थप ध्यान दिनुपर्ने आवश्यकता औंल्याउँदै यस्ता सिर्जनात्मक कार्यक्रमलाई निरन्तरता दिनुपर्नेमा जोड दिए।
मैथिली विकास कोषका अध्यक्ष जीवनाथ चौधरीले प्रदर्शनीलाई व्यवस्थित र प्रभावकारी बनाउन आवश्यक सम्पूर्ण तयारी पूरा भएपछि आजदेखि प्रदर्शनी सुरु गरिएको जानकारी दिए। उनका अनुसार प्रदर्शनीले मधेश प्रदेशका कलाकारहरूलाई आफ्ना सिर्जनाहरू प्रस्तुत गर्ने महत्वपूर्ण अवसर प्रदान गर्नेछ।
प्रदर्शनीमा मधेश प्रदेशका विभिन्न जिल्लाबाट आएका कलाकारहरूको चित्रकला, मूर्तिकला, हस्तकला तथा समसामयिक कला कृतिहरू प्रदर्शनमा राखिएको छ। प्रदर्शनीले स्थानीय कला, संस्कृति र मौलिक पहिचानको प्रवर्द्धनमा टेवा पुग्ने आयोजकको विश्वास छ।
प्रदर्शनी माघ २५ गते देखि माघ २९ सम्म हुने आयोजकले जानकारी दिएको छ । साथै आयोजक संस्थाले सम्पूर्ण कला प्रेमी, कलाकार तथा सरोकारवालालाई प्रदर्शनी अवलोकन गरी मिथिला कला र सिर्जनाको प्रवर्द्धनमा योगदान दिन आग्रह गरेका छन्।
Discussion about this post