गिरिजानन्द साह/धनुषा/माघ १७ गते।
कम्प्युटर एसोसिएसन नेपाल महासंघ (क्यान) धनुषा जिल्ला शाखाद्वारा आयोजित ३ महिने निःशुल्क आधारभूत कम्प्युटर तालिम सफलतापूर्वक सम्पन्न भएको छ। सूचना प्रविधिको पहुँचबाट वञ्चित समुदायका युवायुवतीलाई कम्प्युटर सीपमा दक्ष बनाउने उद्देश्यले सञ्चालन गरिएको उक्त तालिम समापनका अवसरमा आज जनकपुरधाममा विशेष कार्यक्रम आयोजना गरी प्रशिक्षार्थीहरूलाई प्रमाणपत्र वितरण गरिएको हो।
प्रमाणपत्र वितरण कार्यक्रममा जनकपुरधाम उद्योग वाणिज्य संघका अध्यक्ष सुरेन्द्र भण्डारी प्रमुख अतिथिका रूपमा सहभागी रहनुभएको थियो। कार्यक्रममा बोल्दै प्रमुख अतिथि भण्डारीले आजको डिजिटल युगमा कम्प्युटर सीप सबैका लागि अनिवार्य भएको उल्लेख गर्दै क्यान धनुषाले समाजका कमजोर तथा पिछडिएका वर्गलाई लक्षित गरी निःशुल्क तालिम सञ्चालन गर्नु अत्यन्तै सराहनीय कार्य भएको बताउनुभयो। उहाँले यस्ता तालिमले युवाहरूलाई आत्मनिर्भर बनाउँदै रोजगारी तथा स्वरोजगारको अवसर सिर्जना गर्न मद्दत पुग्ने धारणा राख्नुभयो।
क्यान धनुषा शाखाले सामाजिक उत्तरदायित्व अन्तर्गत गरीब, दलित, अपाङ्ग, अल्पसंख्यक तथा जेहेन्दार विद्यार्थीहरूलाई लक्षित गर्दै उक्त ३ महिने निःशुल्क आधारभूत कम्प्युटर तालिम सञ्चालन गरेको हो। तालिममार्फत सहभागीहरूलाई कम्प्युटरको आधारभूत ज्ञान, अफिस प्याकेज, इन्टरनेट प्रयोग, इ–मेल, डाटा व्यवस्थापन लगायतका विषयमा व्यवहारिक प्रशिक्षण प्रदान गरिएको थियो।
क्यान धनुषा शाखाका अध्यक्ष विनय साहले जिल्लामा दक्ष मानव संसाधन उत्पादन गर्ने दीर्घकालीन उद्देश्यका साथ ५१ जना योग्य विद्यार्थीहरूलाई तालिम प्रदान गरिएको जानकारी दिनुभयो। उहाँका अनुसार धनुषा जिल्लाका १२ वटा कम्प्युटर इन्स्टिच्युटको सहकार्यमा तालिम सञ्चालन गरिएको थियो। अध्यक्ष साहले सीमित स्रोत साधनका बाबजुद पनि क्यानले निरन्तर रूपमा सीपमूलक कार्यक्रमहरू सञ्चालन गर्दै आएको र आगामी दिनमा पनि यस्ता तालिमलाई निरन्तरता दिइने प्रतिबद्धता व्यक्त गर्नुभयो।
प्रमाणपत्र वितरण कार्यक्रममा विशिष्ट अतिथिका रूपमा जनकपुरधाम जेसीजका पूर्व अध्यक्ष मनोज साह तथा कम्प्युटर एसोसिएसन नेपाल महासंघ धनुषा जिल्ला शाखाका संस्थापक अध्यक्ष प्रवीन साहको उपस्थिति रहेको थियो। कार्यक्रममा सहभागी वक्ताहरूले क्यान धनुषाले सूचना प्रविधिको विकास र जनशक्ति उत्पादनमा खेलेको भूमिकाको प्रशंसा गर्दै यस्ता कार्यक्रमले समाजमा सकारात्मक परिवर्तन ल्याउने विश्वास व्यक्त गरेका थिए।
कार्यक्रममा धनुषा जिल्लाका विभिन्न कम्प्युटर इन्स्टिच्युटका प्रतिनिधिहरू, प्रशिक्षकहरू, प्रशिक्षार्थी विद्यार्थीहरू तथा अभिभावकहरूको उल्लेखनीय उपस्थिति रहेको थियो। तालिम सम्पन्न गरेका प्रशिक्षार्थीहरूले निःशुल्क तालिम उपलब्ध गराएर भविष्य निर्माणमा सहयोग पुर्याएको भन्दै आयोजक संस्थाप्रति आभार व्यक्त गरेका थिए।
Discussion about this post