जनकपुरधाम/पुस २३ गते । जनकपुर साहित्य महोत्सवको सातौँ संस्करण अन्तर्गत विद्यालय स्तरीय चित्रकला प्रतियोगिता मंगलबार सम्पन्न भएको छ। नव मिथिला फाउन्डेसनद्वारा आयोजित उक्त प्रतियोगितामा विभिन्न विद्यालयका विद्यार्थीहरूको उत्साहजनक सहभागिता रहेको थियो।
‘नेपालको विविधता’ भन्ने थिममा आधारित प्रतियोगितामा सहभागी विद्यार्थीहरूले देशको सांस्कृतिक, भौगोलिक तथा सामाजिक विविधतालाई चित्रमार्फत प्रस्तुत गरेका थिए। प्रतियोगिताबाट उत्कृष्ट प्रदर्शन गर्ने पाँच जना विद्यार्थी छनोट भएका छन्।
छनोट हुनेमा दामोदर एकेडेमीका बाबुल सिंह, ज्ञानदा इन्टरनेशनल स्कूलका ओजस्वी यादव, मोनास्टिक सेकेन्ड्री स्कूलकी आराध्या गुप्ता, वीजडम ट्री स्कूलकी अधरिका कुमारी ठाकुर तथा गोदावरी स्कुलका निशान्त ठाकुर रहेका छन्। आयोजकका अनुसार छनोट भएका विद्यार्थीहरूले महोत्सवको मुख्य कार्यक्रममा हुने चित्रकला प्रतियोगितामा पुनः सहभागिता जनाउने अवसर पाउनेछन्।
नव मिथिला फाउन्डेसनले जनकपुर साहित्य महोत्सव २०८२ अन्तर्गत विद्यार्थी लक्षित विभिन्न सिर्जनात्मक गतिविधि सञ्चालन गर्दै आएको छ। यस क्रममा चित्रकला प्रतियोगितासँगै वक्तृत्वकला, कविता, कला तथा अन्य रचनात्मक प्रतियोगिताहरू समेत आयोजना गरिएको फाउन्डेसनले जनाएको छ।
फाउन्डेसनका अनुसार सातौँ जनकपुर साहित्य महोत्सव आगामी माघ २२ गतेदेखि आयोजना गरिनेछ, जसमा साहित्य, कला र संस्कृतिको विविध पक्षलाई उजागर गरिने लक्ष्य राखिएको छ।
Discussion about this post