जनकपुरधाम/पुस १२ गते। स्वास्थ्य निर्देशनालयका निर्देशक सरोजचन्द्र न्यौपानेको अध्यक्षतामा शुकबार मधेश प्रदेशका जिल्ला स्वास्थ्य कार्यालयहरू तथा स्थानीय तहका स्वास्थ्य शाखाहरूसँग भर्चुअल बैठक सम्पन्न भएको छ। बैठकको उद्देश्य चिसो मौसम तथा शीतलहरका कारण जनस्वास्थ्यमा परेको प्रभावको मूल्याङ्कन गर्नु, हालको तयारी तथा पूर्वतयारीको समीक्षा गर्नु र आवश्यक सहयोगका क्षेत्रहरू पहिचान गर्नु रहेको थियो।
बैठकमा स्वास्थ्य आपतकालीन सञ्चालन केन्द्र (HEOC), स्वास्थ्य तथा जनसंख्या मन्त्रालय (MoHP)बाट जनस्वास्थ्य प्रशासक श्री बन्दना भट्ट र मधेश प्रदेश स्वास्थ्य तथा जनसंख्या मन्त्रालयका जनस्वास्थ्य प्रशासक श्री निलाराम्ब अधिकारीको उपस्थिति रहेको थियो। PHEOC समूहको सहजीकरणमा सम्पन्न उक्त बैठकमा प्रदेश, जिल्ला र स्थानीय तहबीचको समन्वयलाई थप प्रभावकारी बनाउने विषयमा छलफल गरियो।
जिल्ला तथा स्थानीय तहहरूले प्रस्तुतिकरणमार्फत आपतकालीन व्यवस्थापन समितिमार्फत समन्वय गर्दै तयारी अवस्थामा रहेको जानकारी गराएका छन्। साथै, सीमान्तकृत तथा जोखिममा रहेका समुदायलाई लक्षित गरी न्यानो कपडा वितरणजस्ता पहलहरू अघि बढाइएको पनि जनाइएको छ।
सहभागीहरूले जोखिममा रहेका जनसमूहलाई प्राथमिकतामा राख्नु, स्वास्थ्य संस्थाहरूको तयारी सुनिश्चित गर्नु, एम्बुलेन्स सेवा, अस्पताल सञ्जाल तथा औषधि र सामग्रीको बफर स्टक मजबुत बनाउनु आवश्यक रहेकोमा जोड दिएका छन्। महिला स्वास्थ्य स्वयंसेविका, आईईसी सामग्री तथा स्थानीय एफएम रेडियोमार्फत जनचेतना अभिवृद्धि गर्नुपर्ने विषय पनि छलफलमा प्रमुख रूपमा उठाइएको थियो।
बैठक निरन्तर समन्वय कायम राख्ने, जलन तथा सडक दुर्घटनासम्बन्धी तयारीबारे आगामी दिनमा थप छलफल गर्ने, साझेदार संस्थाहरूसँग स्रोत नक्साङ्कन गर्ने तथा थप सहयोग आवश्यक परेमा प्रदेश सरकारलाई औपचारिक रूपमा जानकारी गराउने प्रतिबद्धतासहित सम्पन्न भएको छ।
Discussion about this post