जनकपुरधाममा अन्तर्राष्ट्रिय मानव अधिकार सम्बन्धी राष्ट्रिय गोष्ठी हुने

जनकपुरधाम/मङ्सिर २२ गते। अन्तर्राष्ट्रिय मानव अधिकार दिवसको अवसरमा जनकपुरधाममा राष्ट्रियस्तरको गोष्ठी हुने भएको छ। नेपाल बार एसोसिएशन जनकपुरधामको आयोजनामा मंसिर २४ गते महेन्द्र नारायण निधि मिथिला केन्द्रमा कार्यक्रम गरिने जनाइएको छ।

सोमबार आयोजित पत्रकार सम्मेलनमा बार एसोसिएशन जनकपुरधामका अध्यक्ष विमल कुमार मिश्रले गोष्ठीको विस्तृत जानकारी सार्वजनिक गर्दै देशभरका वरिष्ठ अधिवक्ता, अधिवक्ता, पूर्व महान्यायाधिवक्ता तथा कानुन व्यवसायीसहित करिब एक हजार सहभागी हुने बताए।

गोष्ठीको उद्घाटन नेपालका प्रधान न्यायाधीश प्रकाशमान सिंह राउतले गर्नेछन्। कार्यक्रममा ३२ जनालाई सम्मान गरिनेछ, जसमा १६ जना न्यायाधीश र १६ जना अधिवक्तालाई सम्मानपत्र प्रदान गरिने अध्यक्ष मिश्रले जानकारी दिए। यस्तै, मानव अधिकार क्षेत्रमा योगदान पुर्‍याएका एक जना कानुन व्यवसायीलाई ‘सीता मैनाली पुरस्कार’ सहित २५ हजार रुपैयाँ नगद र सम्मानपत्र प्रदान गरिनेछ।

अध्यक्ष मिश्रका अनुसार यो गोष्ठी पछाडि परिरहेको न्यायिक पहुँचलाई मजबुत बनाउन महत्वपूर्ण अवसर हुनेछ । “नागरिकहरूले समयमै, सहज रूपमा र न्यायपालिकासम्म बराबरी पहुँच पाउनुपर्छ । त्यसका लागि कानुनी समुदाय, सरोकारवाला निकाय तथा नागरिकबीच समन्वय अपरिहार्य छ,” मिश्रले भने ।
उहाँका अनुसार मुद्दा दर्ता प्रक्रियामा ढिलाइ, नागरिकमैत्री सेवा अभाव, कानुनी सचेतनाको कमी तथा स्थानीय तह र अदालतबीच समन्वयको अभाव—यी विषयहरू गोष्ठीका मुख्य एजेण्डा रहनेछन् । विशेष गरी महिला, गरिब तथा सीमान्तकृत समुदायलाई न्यायिक प्रक्रियामा सहज पहुँच कसरी उपलब्ध गराउन सकिन्छ भन्ने विषयमा पनि छलफल हुनेछ ।

उनका अनुसार मुद्दा दर्तामा हुने ढिलाइ, नागरिकमैत्री सेवा अभाव, कानुनी सचेतनाको कमी, स्थानीय तह र अदालतबीच समन्वयको कमजोरी—यी विषय गोष्ठीका मुख्य एजेण्डा हुनेछन्। विशेष गरी महिला, गरिब तथा सीमान्तकृत समुदायलाई न्यायिक सेवा सरल बनाउने उपायमाथि विस्तृत छलफल हुने बताइएको छ। गोष्ठीलाई सफल बनाउन सुरक्षा, यातायात, आवास तथा व्यवस्थापनका तयारी अघि बढाइएको अध्यक्ष मिश्रले बताए। उनले नगरवासी, सरोकारवाला तथा सञ्चारकर्मीलाई सक्रिय सहभागिता जनाई न्यायिक सुशासन र मानव अधिकार सुदृढीकरणमा साथ दिन आग्रह गरे।