धनुषा : ”ठुलो आवाज निकाल्ने १३ मोटरसाईकल ट्राफिक प्रहरीको नियन्त्रणमा”

धनुषा/कात्तिक ९ गते। धनुषा जिल्लाको विभिन्न स्थानहरूबाट ठुलो आवाज निकाल्दै ध्वनि प्रदूषण गर्ने १३ मोटरसाइकल धनुषाका ट्राफिक प्रहरीले नियन्त्रणमा लिएको छ।

ध्वनि प्रदूषणका कारण वातावरणीय सन्तुलन मात्र नभई मानव स्वास्थ्यमा समेत गम्भीर असर पर्ने भन्दै जिल्ला ट्राफिक प्रहरी कार्यालय धनुषाको प्रमुख सुर्य बहादुर शाही प्रहरीले यस्तो कारबाहीलाई नियमित बनाउने बताएको छ। ठुलो आवाज निकाल्ने गरी मोटरसाइकल परिमार्जन (मडिफाई) गर्ने, साइलेंसर परिवर्तन गर्ने वा अवैधानिक रूपमा प्रयोग गर्ने सवारीधनी माथि निगरानी बढाइएको उनले बताए ।

उनका अनुसार नियन्त्रणमा लिइएका सवारी साधनहरूलाई सवारी तथा यातायात व्यवस्था ऐन, २०४९ अनुसार कानुनी प्रक्रिया पूरा गरी जरिवाना र अन्य आवश्यक कारबाही गरिनेछ।

ट्राफिक प्रहरीले सर्वसाधारणलाई पनि सवारीसाधन चलाउँदा ध्वनि प्रदूषण नगर्ने र सुरक्षित तथा जिम्मेवार चालक बन्न आग्रह गरेको छ।