गिरिजानन्द साह/जनकपुरधाम/असार १३ गते। जनकपुरधाम उपमहानगरपालिकाको आयोजनामा पहिलो पटक सम्पन्न भएको “उप–मेयर कप कबड्डी प्रतियोगिता” मा श्री सरस्वती नमुना माध्यमिक विद्यालय,जनकपुरधाम विजयी बनेको छ। बसहियास्थित गोगल प्रसाद माध्यमिक विद्यालयको प्रांगणमा आयोजित फाइनल खेलमा सरस्वती मा.वि. कनकपट्टीलाई पराजित गर्दै उपाधि हात पारेको हो।
उपमहानगरपालिकाले नगर क्षेत्रभित्रका विद्यालयहरूमा अध्ययनरत छात्राहरुलाई लक्षित गर्दै पहिलो पटक आयोजना गरेको यस प्रतियोगितामा १० वटा विद्यालयका छात्रा टोलीहरूले सहभागिता जनाएका थिए। खेलमार्फत विद्यालयस्तरमै छात्रा खेलाडीहरूबीच प्रतिस्पर्धात्मक भावना विकास गराउनुका साथै उनीहरूको खेल प्रतिभा पहिचान र प्रोत्साहन गर्ने उद्देश्य रहेको आयोजकले बताएका छन्।
फाइनल खेलमा श्री सरस्वती नमुना मा.वि. जनकपुरधाम र सरस्वती मा.वि. कनकपट्टीबीच प्रतिस्पर्धा भएको थियो। दुवै टोलीबीचको खेल अत्यन्त रोमाञ्चक र प्रतिस्पर्धात्मक रह्यो। अन्ततः जनकपुरधामको श्री सरस्वती नमुना टोलीले उत्कृष्ट प्रदर्शन गर्दै प्रतियोगिताको उपाधि जित्न सफल भयो। प्रतियोगितामा श्री सरस्वती नमुना मा.वि. जनकपुरधाम पहिलो, सरस्वती मा.वि.कनकपट्टी दोस्रो र कन्टीर झा नमुना मा.वि. बभनगामा र गोगल प्रसाद मा.वि. बसहिया तेस्रो स्थान हासिल गरेको छ। तीनै स्थान प्राप्त विद्यालयका टोलीलाई जनकपुरधाम उपमहानगरपालिकाको तर्फबाट ट्रफी, प्रमाणपत्र र पुरस्कार प्रदान गरिएको थियो।
कार्यक्रमको समापन समारोहमा जनकपुरधाम उपमहानगरपालिकाका मेयर मनोज कुमार साह, उपमेयर किशोरी साह, विभिन्न विद्यालयका शिक्षक, पदाधिकारी, पत्रकार तथा स्थानीय खेलप्रेमीहरूको बाक्लो उपस्थिति रहेको थियो। प्रमुख अतिथिहरूले सहभागी टोलीहरूको प्रशंसा गर्दै भविष्यमा अझ ठूलो स्तरमा प्रतियोगिता सञ्चालन गरिने प्रतिबद्धता जनाएका थिए। जनकपुरधाम उपमहानगरपालिकाले आगामी दिनहरूमा विद्यालयस्तरीय खेलकुद गतिविधिहरूलाई थप व्यवस्थित, समावेशी र व्यावसायिक बनाउँदै लैजाने र नगरभरका छात्रा र छात्रहरूलाई खेलकुदमा सक्रिय बनाउन विभिन्न खेलकुद कार्यक्रम गर्ने योजना रहेको छ । यस प्रतियोगिताले विद्यालयस्तरमै छात्रा खेलाडीहरूबीच आत्मविश्वास, नेतृत्व क्षमता र सहकार्यको भावना विकास गराएको आयोजकहरू विश्वास गर्छन्।
Discussion about this post