लियो क्लब अफ जनकपुर मोनास्टिकको १२औं वार्षिक साधारणसभा सम्पन्न, नयाँ कार्यसमिति चयन अध्यक्षमा आदित्य सिंह राजपूत

गिरिजानन्द साह/जनकपुरधाम/असार १० गते । लियो क्लब अफ जनकपुर मोनास्टिकको १२औं वार्षिक साधारणसभा भव्य रूपमा सम्पन्न भएको छ। जनकपुरधामस्थित मोनास्टिक स्कुल तथा कलेजमा आयोजित उक्त कार्यक्रम क्लबका एडभाइजर एवं मोनास्टिक स्कुल तथा कलेजका डाइरेक्टर डा. सोनु साहको प्रमुख आतिथ्यतामा सम्पन्न भएको हो।

साधारणसभामा विशिष्ट अतिथि लियो डिस्ट्रिक्ट काउन्सिल ३२५ एफकी आकृति न्यौपाने, क्लबका आइपीपी लियो अनुराग साह, लियो क्लब अफ जनकपुरधाम २०२५/२६ का अध्यक्ष लियो ओम कापरी, प्रथम उपाध्यक्ष विकास साह, लियो क्लब अफ बर्दिबास समाजका अध्यक्ष निरञ्जन कुशवाहा, लियो क्लब अफ मिथिला ढल्केवरका अध्यक्ष दिपेश सिंह लगायत विभिन्न लियो क्लबहरूका प्रतिनिधिहरू तथा क्लबका सम्पूर्ण सदस्यहरूको उल्लेखनीय उपस्थिति रहेको थियो। साधारणसभामा क्लबका गतिविधि, उपलब्धि र आगामी योजना समेटिएको प्रतिवेदन प्रस्तुत गरिनुका साथै नयाँ कार्यसमिति समेत चयन गरिएको छ।

प्रमुख अतिथि डा. सोनु साहले क्लबको निरन्तर प्रगति र युवाहरूको सक्रिय सहभागितालाई प्रेरणादायी बताउँदै संस्थागत सुदृढीकरण, नेतृत्व विकास र समाजसेवामार्फत भविष्य निर्माण गर्ने मार्गमा क्लबले खेलेको भूमिकाको प्रशंसा गरे।

कार्यक्रमको समापनमा क्लबका पदाधिकारीहरूले धन्यवाद ज्ञापन गर्दै सबैको सहयोगले क्लबको आगामी यात्रा अझ प्रभावकारी र समर्पित हुने विश्वास व्यक्त गरे।

यस साधारणसभाले लियो क्लब अफ जनकपुर मोनास्टिकको १२ वर्षे यात्रामा नयाँ उत्साह र प्रतिबद्धताको शंखघोष गर्दै सामाजिक सेवामा युवाहरूको अग्रणी भूमिकालाई पुनः पुष्टि गरेको छ।

साधारणसभामा लियो वर्ष २०२४/२५ को आर्थिक विवरण क्लबका सचिव विवेक कुमार झाले प्रस्तुत गरेका थिए। उनले क्लबको आय–व्यय पारदर्शिता पूर्वक प्रस्तुत गर्दै सबैको सहकार्यमा क्लबले विभिन्न सामाजिक र शैक्षिक कार्यक्रमहरू प्रभावकारी रूपमा सम्पन्न गरेको जानकारी दिए।

उक्त सभाबाट लियो वर्ष २०२५/२६ का लागि नयाँ कार्यसमिति समेत चयन गरिएको छ। नयाँ कार्यसमितिमा आदित्य सिंह राजपूत अध्यक्ष, साक्षी झा उपाध्यक्ष र अंकित पण्डित कोषाध्यक्षमा निर्वाचित भएका छन्।

नवनिर्वाचित अध्यक्ष राजपूतले आगामी कार्यकालमा युवाको सशक्तिकरण, शिक्षा, स्वास्थ्य तथा सामाजिक सेवाका क्षेत्रमा प्रभावकारी कार्यक्रम सञ्चालन गर्ने प्रतिबद्धता व्यक्त गरेका छन्।

कार्यक्रममा सहभागी अतिथिहरूले लियो क्लबको भूमिका सराहना गर्दै युवाहरूलाई सामाजिक उत्तरदायित्वमा अग्रसर गराउने यस्ता क्लबहरूको योगदान अतुलनीय रहेको बताए।

कार्यक्रम अन्त्यमा धन्यवाद ज्ञापन गर्दै क्लबका पदाधिकारीहरूले आगामी दिनमा अझ सशक्त र सक्रिय रूपमा लियो अभियानलाई अघि बढाउने प्रतिवद्धता व्यक्त गरे।